ITI INDAYON NI LAGIP: Nakasalda nga ayat (Tuloyna)

Kinontarko ti urnongko. No agin-inutak, maiyanayko met ngata agingga iti agturposak.

Diak impalgak ken ni Brenda ti panggepko. Ammok a dina abuloyan ti aramidek. Iti agdama a puestok, dakkel metten ti sueldok ket narigaten a makasarakak pay iti kasta no agbirokak iti sabali a panggedak.

Maysa laengen a surat ti imbusonko ken ni Sir Marius a nangipalgakak nga agikkatakon iti trabahok. Impambarko a marigatannak unay kadagiti asignaturak isu a kapilitan a full-time ti tiempo nga ipaayko iti panagbasak. Ammok a dinto la ketdi patien ni Sir Marius dayta a pambarko ngem ti nasken ket maiyadayoak iti ririda nga agassawa ken makatulongak iti pannakalapped ti pannakarakrak ti pagtaenganda.

Saan a nasdaaw ni Brenda idi impakadak ti yaalisko iti pagkaseraak. Ammok, mariknana met ti rikriknaek. Pinagkarik a dina ibagbaga ken ni Sir Marius ti baro a pagkaseraak.

Iti panaglabas ti aldaw, inggaedko ti nagbasa. Kinuna ti maestrami a posible a siak ti maysa a mapadayawan no agturposkami. Naragsakannak. Dandanikon magaw-at ti arapaako iti biag.

Idi simmarungkar ni Julius, imbagakon kenkuana a bumirok laengen iti sabali agsipud ta awan ti namnamaenna kaniak.

“Makabirokkanto iti adayo a nasaysayaat ngem siak,” nakunak.

Nabayag a di nagtimek ni Julius. Idi agangay, kinunana: “No kasapulannak, tumawagka laeng ket tumarayak nga umay,”

“Agyamanak unay,” insungbatko ket piniselko ti dakulapna, tanda nga agsinakami nga awan ti dakes a riknami iti tunggal maysa.

Nagtuloy ti pannakalapgis dagiti panid iti kalendario. Kunak no agulimeken ti panagbiagko ngem nagbiddutak. Maysa a sardam, madamaak nga aglutluto iti pangrabiik idi  natugtog ti ridaw.  Ti baket nga akinkukua iti apartment a pagkaseraak.

“May bisita ka,” kinuna sana insungo ti sumursurot kenkuana. Nakigtotak idi makitak ti sangailik. Ni Sir Marius!

“Ne, apayen, sir?” nakunak. Kusokuso ti buokna. Nalunes ti badona. Nakainom. Pinastrekko iti kuartok. Pinagtugawko iti kakaisuna a plastik a tugaw iti abay ti bassit a tawa ti nakipet a kuartok.

Naammuak a nagringgorda manen ken ni Ma’am Lyka ta nangipila ti asawana iti pannakiabig kontra kenkuana.

“Kasano a napasamak dayta ket dimo met ginuliban ni Ma’am Lyka, sir!” nakunak.

Adda kano dagiti retrato nga impakita ni Ma’am Lyka iti korte. Kas iti pannanganmi iti restaurant. Ken daydi ipapanmi iti Tagaytay a nangipasiar ken ni Sheila.

“Adda gayam detektib a tinangdananna a nangsipsiput kaniak,” kinuna ni Sir Marius.

“Ngem awan ti dakes nga inaramidta, sir!”

“D-diak ammo ti aramidek. N-ni Sheila ti pampanunotek. Makaapekto la ketdi kenkuana ti pannakarakrak ti pagtaenganmi!”

Indumudom ni Sir Marius ti dua a dakulapna iti rupana. Nagunggon ti abagana.

Diakon nakaibtur. Inarakupko. “M-maamiristo ni Ma’am Lyka a nagbiddut iti panagipapanna, a dimo liniputan, sir,” nakunak sako inap-aprosan ti abagana.

Umanges-anges ni Sir Marius a nagsadag iti barukongko. Nabayag. Madamdama, nariknak ti yiirut ti yaarakupna kaniak. Nagkintayegak idi mariknak ti nabara a sang-awna iti lengngesko, sa iti pingpingko. Ad-addan ti kintayegko idi nasapulanna ti bibigko ket inagkannak iti napaut.

(Maigibusto)