Diak ammo ngem nakariknaak iti panangaasi ken ni Mang Marius idi maammuak ti agdama a kasasaad ti taeng nga impatakderda ken ni Ma’am Lyka nga asawana. No sabali laeng a lalaki ti nakapasamakan dayta, mabalin a pinanawannan ti taengda.

Nakariknaak iti panagraem ken ni Mang Marius gapu ta iti baet ti pannakaduktalna a saan gayam a pudpudno nga ay-ayaten ti asawana, nabaelanna ti agibtur tapno saan a marakrak ti pamiliana.  Ni la ketdi Sheila, ti anakda, ti pinampanunotna. Dina la ketdi kayat a dumakkel ti anakna a produkto ti narakrak a pagtaengan.

“Dispensarennak koma iti daytoy a naisalaysayko,” kinuna ni Mang Marius. “Awan ngamin ti pangiyasugak iti agdama a rikriknaek.”

“Agyamanak ketdi, sir, ta talkennak a makaammo iti palimedyo ken ni Ma’am Lyka,” nakunak.

Immisem ni Mang Marius. “Diak ammo no apay a nakalaglag-an ti riknak kenka,” nakunana idinto a piniselna ti dakulapko.

Manong Danny, diak ammo no apay nga adda kasla koriente a nagkarayam iti takiagko ken in-inut a nangsallukob iti sibubukel a kinataok.

“Rabiin, sir, ket adda pay aramidek idiay balay,” nakunak laengen idinto nga inin-inayadko a linapsut ti imak.

Intulodnak ni Mang Marius iti kaserak. Aglallalayak nga immuneg iti kaserami. Nadatngak ni Bella nga agbasbasa iti komiks iti nailet a salas. Masmasdaaw a nangperreng kaniak.

“Naragsakka, a,” nakunana. “Kayarigam ti nakadiakpat iti dakkel iti Lotto.”

Namrayak laeng ti nagkatawa. “Inta ketdin mangan ket mabisinakon,” nakunak. Inyawatko dagiti ginatang ni Mang Marius a pangrabiimi.

“Naggadun, sika!” nakuna ni Bella. Dagus nga impanna iti kusina. Madamdama, agay-ayaben.

“Ayna, makaangotak sa metten iti ginelgel a baraniw.  Nagdaton kadin kenka ni Sir Marius?” sinaludsod ni Bella idinto a nagpardas ti panagisubona iti naprito a manok.

“Apay nga agdaton kaniak ket adda asawana?” nakunak.

“Loka, saan a naasideg kenka ni Sir Marius no awan ti riknana kenka.”

“Agtalnaka man,” nakunak. “Dimo man ikkan iti sabali a panagipapan ti kinaasidegna kaniak. Siguro, agtalek kaniak a panangiyasuganna iti problemada ken ni Ma’am Lyka.”

“Mamatika met?” nakuna ni Brenda. “Kasta dagiti lallaki, umuna nga alaenda ti simpatiam tapno inton iruanganna ti ayatna, saanmonton a mapagkedkedan gapu iti mariknam a panangaasi kenkuana.”

Diak nagtimek. Ngem akuek a nagbaliw ti panagkitak ken ni Mang Marius iti panangipalgakna iti kaawan ti ayat iti nagbaetanda ken ni Ma’am Lyka.

Diak napakpakadaan ti simmaruno a saludsos ni Brenda: “No agdaton kenka ni Sir Marius, aklonem kadi?”

Kellaat immapon iti panunotko: no pumudno ti kuna ni Brenda, awatek kadi ti ayatna? Diak ammo, ngem dayta ti italtalukatik ti pusok!

(Adda tuloyna)