Footer

ITI INDAYON NI LAGIP: Nakasalda nga ayat (Tuloyna)

Nagtuloyak ngarud nga agbasa. Komersio ti innalak. Kas kuna ni Sir Marius, no makaturposak, siakton ti hepe iti sales department. Agretironton ni Manang Linda, ti hepe, kalpasan ti uppat a tawen.

Kas inkari ni Sir Marius, agtrabahuak iti bigat ket sumrekak iti klasek iti malem, manipud ala una agingga iti alas otso.

Agsipud ta ngimmato metten ti posision ken sueldo ni Brenda, immaliskami iti nasaysayaat bassit a pagkaseraanmi. Pinilimi diay asideg ti pagtrabahuanmi ta di pay isu a maratratankami iti plete.

Gapu iti panagtrabaok ken panagbasak, dandani payen awan ti tiempok nga umaliwaksay. Ngem inan-anusak agsipud ta mamatiak a no diak agsakripisio, diak matungpal ti arapaapko iti biag. Ken maysa, manmano daytoy a gundaway a ti akinkukua iti pagtrabahuak ket palubosannak nga agbasa a sibubukel ti sueldok.

Iti Sabado wenno Domingo, sumarungkar ni Sir Marius iti kaserami. Itugotna ni Sheila. Nadekket kaniak ti anak ni Sir Marius. Tita pay ti awagna kaniak.

No ipasiarnakami ni Sir Marius, saanna nga ipalubos nga aggastokami. Pamrayannak a kirman ni Brenda no kasdiay a padasek ti kumaut iti petakak.

“Adu ti pagbusbosam iti eskuela. Di pay isu a maikkat iti budgetmo,” kuna ni Sir Marius.

“Ay, iti dayta a kinagalante ni Sir Marius, mainlabak kenkuana,” nakuna ni Brenda. “No makasarakak iti kas kenkuana, guyodekon a dagus tapno saanen a makapaluspos pay.”

“Ania pay ti birokem ken ni Claudio?” nakunak. “Nasingpet, awan ti bisiona. Ken kangrunaanna, ipatpategnaka.”

“No idiligko ngamin ni Claudio ken ni Sir Marius, adu ti pakaarusan ti nobiok. Ngem an-anusakon ta awan pay met ti sabali a dimmawi,” inggarikgik ni Brenda.

“Ne, ta adda pay panggepmo a mangsukat kenkuana,” nakunak nga umis-isem.

“Joke only. Loveko ni Claudio, sika. Saanko nga isukat iti sabali. Ngem saan a dakes ti agarapaap a makasarakak iti kas ken ni Sir Marius. No siak ti sika, paripiripak nga adda met riknak kenkuana.”

“Oy, agbainka ita bagim,” nakunak. “Ken maysa, awan ti laokna a sabali ti pannakilangen ni Sir Marius kadata,” nakunak.

Kiniddayannak ketdi ni Brenda. Kinamatko sako kinuddot iti napino.

Ngem adda dagiti gundaway nga umagibas iti panunotko ti ipaspasagid ni Brenda. Talaga kadi nga adda sabali a rikna ni Sir Marius kaniak?

Diak ammo ta no mapanunotko dayta a posibilidad, adda sumangbay a karkarna a rikna kaniak. Nasaludsodko iti bagik: aggayatak kadi metten ken ni Sir Marius?

Ti ammok, saanen nga agbaliw ti naannayas a panagbiagko. Ngem iti panagdaliasatko iti dana nga agturong iti arapaapko iti biagko, nasarakak ti bagik iti maysa a nagkurusan. Dimteng daytoy idi naam-ammok ni Julius.

(Adda tuloyna)