Footer

ITI INDAYON NI LAGIP: Nakasalda nga ayat (Tuloyna)

Padak nga Ilokano ni Julius. Taga-Candon, Ilocos Sur. Agkaklasekami iti Banking.

Manipud idi nagam-ammokami ken ni Julius, masansanen nga agpasiar iti kaserami ken ni Brenda.

“Ipudosam man,” kinunak ken ni Brenda. “Maikari met la iti nasam-it a wenko?”

“Ok met ni Julius,” insungbat ni Brenda. “Sige, sungbatamon ta foursometayo nga agpasiar.”

“Saan pay a nagdaton kaniak.”

“Loka, asidegen nga agdaton. No agpudno, sungbatamon a dagus.”

“Panunotek pay a nalaing. No makinobioak, saanto ngata nga agbalin a lapped iti arapaapko a makaturpos? Karik dayta iti bagik… ken ni Sir Marius.”

“Oy, apay a naisagpaw iti saritaan ni Sir Marius? Makasaepak sa iti ginelgel a baraniw. Nainlabkan kenkuana, ania?”

Diak nakatimek. Apay nga agpayso a nailaok iti saritaan ni Sir Marius?

Ngem inkarik iti bagik a makaturposak iti adal. Dayta met la ti impasingkedko ken ni Sir Marius. No diak matungpal ti karik, anianto laengen ti rupak kenkuana?

Ngem annugotek nga adda mabangbangon a naisalsalumina a paset ni Julius iti pusok.

Maysa a malem, impudno ni Julius ti ayatna. Nupay ninamnamak, diak nakatimek.

“Ay-ayatenka,” nakunana. “Sapay koma ta adda kaibatogak dita pusom.”

“B-bay-am ta panunotek pay,” insungbatko. “Ken maysa, makatawen pay sata agturpos. Makaurayka iti kasta kabayag?”

“Makaurayak,” impanamnama ni Julius.

Nagtuloy latta ti panagpasiar ni Julius iti kaserak. No dadduma, gumatang iti naluto a sida ket mangaldawen iti kaserami.

No met adda klasemi, agkitakami iti kantina ti pagadalan ket ditoy ti pagmeriendaanmi. No adda mapasangpetna nga alawansna, isun ti aggasto. No kasusueldok met, siak ti taya.

Adu pay ketdin a kaklaseanmi ti mangipagarup nga agnobiokami ken ni Julius. Ngem pamrayak la ti agkatawa no sutilendak. Ni laeng Brenda ti makaammo a diak pay sinungbatan ni Julius.

Ngem diak impagarup a dumteng ti aldaw nbga agproblemaak mainaig iti ayat. Nangrugi daytoy idi naranaan ni Sir Marius ni Julius iti balay.

“Agsukatkan ta intayo agpasiar kada Shiela iti Tagaytay,” impasungad ni Sir Marius apaman a nakatadog iti salas. Ngem saanna a naituloy ti sawenna pay idi mataldiapanna ni Julius. “Adda gayam sangailim,” nakunana idi agangay.

“Sir Marius, ni Julius. Julius, ni Sir Marius, ti akinkukua iti pagtagilakuan a pagtrabtrabahuak,” pinagam-ammok ida.

“Saanakon nga agbayag ket addan sa papananyo,” timmakder ni Julius. Ngem saan a nailaksid kaniak ti napigket a panangkitana kaniak sakbay a pimmanaw.

Agimon la ketdi ni Julius ken ni Sir Marius!

(Adda tuloyna)