Footer

ITI INDAYON NI LAGIP: Nakasalda nga ayat (Tuloyna)

Nabatikami iti salas ken ni Sir Marius a nangisursurot ti panagkitana iti likudan ni Julius.

“Isu kadi?” kasla awan aniaman a sinaludsod ni Sir Marius.

“Agar-arem, Sir, ngem diak pay sinungbatan. Agturposak pay.”

Saanen a nagtimek pay ni Sir Marius.

Bayat ti panagdaliasatmi nga agpa-Tagaytay, adu ti estoria ni Sheila ngem naulimek ni Sir Marius. Ita man pay, nakunak.

“No makaturposka, sungbatamon ni Julius?” pagammuan sinaludsod ni Sir Marius.

“Awan pay iti panunotko dayta, sir. Kalpasan a makaturposak, panggepko pay a tulongan dagiti kabsatko iti panagbasada. Makauray ni ayat.”

Nagtung-ed ni Sir Marius. Madamdama, nagsublin ti ragsakna.

Ngem nagbalin a puzzle kaniak ti nagbalin a tignay da Sir Marius ken Julius iti panagsarakda.

Nadakamatko daytoy ken ni Brenda. Nagkatawa ti gayyemko.

“Nalawag ti tignayda nga agselosda,” nakunana.

“Ania ti pagselosanda?”

“Ay, dika makadlaw!” nakuna ni Brenda. “Husto ti suspetsak. Adda rikna ni Sir Marius kenka!”

Idi addaak iti iddak, saannak a makaidna a mangpampanunot iti sinao ni Brenda. Ni Sir Marius, adda panagayatna kaniak? Imposible a mapasamak dayta, nakunak iti nakemko.

Makalawas a saan a simrek ni Sir Marius. Nadamagko a nagsakit ket nayospital. Napanmi sinarungkaran ken ni Brenda.

Naammuanmi a nag-alta presion ni Sir Marius gapu ta nagsubangda ken ni Ma’am Lyka. Ngem di imbaga ni Sir Marius ti gapu ti nagsubanganda nga agassawa. Saankami metten a nagun-uni. Ammomi a selos ti puon ti panagsubangda. Agselselos ni Ma’am Lyka.

Idi rummuarkami iti ospital, naklaatak ta nakitak ni Julius a mangur-uray kadakami iti ballasiw-kalsada.

Immasideg kadakami. “Inur-urayka iti eskuela. Nasapaka gayam a naggawid.”

“Kasano ti pannakaammom nga addakami ditoy?” sinaludsodko.

“Apay, adda kadi dimo kayat a maammuan iti yaayko ditoy?” imbales ni Julius.

“Adda gayam asikasuek iti balay, umunaakon,” kinuna ni Brenda. Ngem diak pinalusposan.

“Dimo pay sinungbatan ti saludsodko,” kinuna ni Julius.

“Awan ti makaipawil iti sadino man a papanak,” nakunak. “Saanka a nobio tapno ipakadak kenka ti papanak.”

“Ammok, su a dinak sungbatan ta adda gayam sugar daddym!”

Iti apagdarikmat, timmayab ti dakulapko ket nanalpaak iti pingping ni Julius.

“Nagbaba metten ti panagkitkitam kaniak!” nakunak ket ginuyodkon ni Brenda nga inyadayo.

(Adda tuloyna)