Footer

ITI INDAYON NI LAGIP: Nakasalda nga ayat (Tuloyna)

Maysa a malem a panaggapuk iti pagtrabahuak, imbaga ni Brenda nga adda textko. Iti selpon ni Brenda ti pagtetextan da ading ta diak kabaelan pay ti maaddaan iti selpon.

Binasak ti text. Naggapu ken ni ading. Adda kano ni nanang iti ospital. Trangkaso ti sakitna. Naalana kano iti pannakatudona iti talon. Kasapulanda kano ti kuarta.

Kapilitan a nangiruarak iti iduldulinko ket impaw-itko. Ammok a mataktak manen ti panagbasak ngem ipatpategko ni nanang.

Kalpasan ti makabulan, simmublat ni tatang nga intarayda iti ospital. Nakaro gayamen ti ulcerna. Kasapulanna ti pannakaopera.  Dakkel ti gatad a kasapulanna.

Nagbalin a dakkel a problemak ti pangalaak iti gastuek. Kasanon? Bassiten ti naidulinko a kuarta ket saan la ketdi nga umanay a pagbayadna iti ospital.

Inyumanko ti parikutko ken ni Brenda. Uray isu, awan met ti ania nga urnongna ta dua a kabsatna ti pagbasbasaenna iti kolehio.

Iti dayta a malem bayat ti panagsukatko sakbay nga aggawidak, makulkolan ti panunotko a mangpampanunot iti pangalaak iti ipaw-itko ken ni nanang a pagbayadda iti ospital. Diak napupuotan ti iseserrek ti sekretaria.

“Dumagaska kano iti opisina ni sir,” kinunana. “Adda kayatna a gatangen para diay anakna ket kuyogem kano.”

“Sige, sumarunoakon,” nakunak. Kellaat nga adda naggilap iti panunotko. Ania ngata no umutangak ken ni Boss? Ngem siak met laeng ti nanglapped iti bagik. Kababain kenkuana, baka ipagarupna a gungundawayak ti kinaasidegna.

Umasideg gayam ti kasangay ni Sheila, ti anakna. Nagdamag ni Mang Marius no ania ti nasayaat nga iregalona. Insingasingko a gumatang ni Mang Marius iti libro a para iti mangrugrugi nga agbasa.

“Mayatak iti dayta a singasingmo,” nakunana. “Kuyogennak ngarud a mapan agbirok iti libro iti National Book Store.”

Awan ti timtimekko bayat ti panagbirokmi iti libro. Idi inyawis ni Mang Marius ti panagmeriendami pay sakbay ti panangitulodna kaniak iti kaserak, imbagak nga iti sabalinton nga aldaw.

“Adda kadi problemam?” sinaludsod ni Mang Marius.

“A-awan,” insungbatko. “Adda ngamin aramidek idiay kaserak.”

“Aguray ngarud ta agpabungonak iti iyawidmo ta saankayton nga agluto ken ni Brenda,” nakunana.

“Saanen, kababain,” nakunak. “Adu unayen ti utangko a naimbag a nakem kenka, sir.”

“Nakunak idin, awagannak laeng iti naganko. Saannak met a lakay unay, a. Pito la a tawen ti baetta.”

“Amangan no adda masarita ni misismo iti daytoy a panangkuykuyogko kenka. Baka sabali ti pangipapananna…”

“Ba’am latta ni Lyka,” kinunana. “Awan bibiangna asinoman ti kaduak basta saanko la ketdi a biangan ti aramidna.”

“A-ania ti kayatmo a sawen, sir?” nakunak.

“Dakkel a biddut ti panagkallaysami. Awan ti ayat iti nagbaetanmi.”

Ket naasut ti palimed ni Mang Marius.

Agkasosio iti kompania dagiti ama da Mang Marius ken Ma’am Lyka. Nakakaud ti ama ni Ma’am Lyka iti dakkel a pondo iti kaha ti kompania. Idi damo, awan ti makaammo no di la dagiti agama.

Nagbalin ni Ma’am Lyka a naasideg ken ni Mang Marius. Maysa a rabii, inawis ni Ma’am Lyka ni Mang Marius nga mapanda ag-night club. Adu ti nainomda. Kabigatanna, nariingan laengen ni Mang Marius a kaiddana ni Ma’am Lyka.

Kinuna ni Ma’am Lyka a masapul nga itakder ni Mang Marius ti inaramidna. Kapilitan nga inkallaysa ni Mang Marius ni Ma’am Lyka.

Naduktalan ti papang ni Mang Marius ti nakaud a kuarta ti papang ni Ma’am Lyka. Ngem saanen a nagdarum ta impagapuna iti panagbalindan a maymaysa a pamilia. Ngem nawaswas ti sosioda kalpasan a naikkat amin a nakaud ti papang ni Ma’am Lyka.

Kalpasan a nakalusot ti amana, nagbaliw ti pannakilangen ni Ma’am Lyka ken ni Mang Marius. Nagbalin a nalamiis iti asawana.

“Inaramatnak laeng gayam tapno makalusot ti amana iti posible a pannakaidarumna,” nakuna ni Mang Marius.

(Adda tuloyna)