Footer

ITI INDAYON NI LAGIP: Pannubok (Maudi a paset)

Inggaedko ti nagadal tapno ipakitak kenkuana a saannak   a dambel wenno kuneng a kas kinunana.

Maysa a malem, Manong Danny, diak nakaitugot iti pagdalusmi iti garden iti subjectmi nga Agriculture.  Nagdanagak ta sigurado nga agunget ni Maestro Olivar a maestromi.  Naistrikto ken naunget ti maestromi.  Idi damagenna no sino ti awan ti intugotna, inngatok ti imak.  Limakami ngata nga awan naitugotna.

“Umaykayo ditoy sango!”  kinunana.

Pinaruar ti maestromi dagiti adda intugotna sanakami sinango. “Makitayo dayta bigao nga adda bukel ti balatongna, ken makitayo kadi dayta ladawan ni Congressman Cua a nakakatawa?”

“Wen sir,” kinunami.

“Agparintumengkayo dita agingga a malpas ti orastayo ditoy.”

Agmaysa nga oras a nakaparintumengkami, Manong Danny.

Nagsangitkami a lima. Saan laeng a gapu ta nasakit ti tumengmi no di gapu iti kinaulpit ti maestromi nangruna kadakami nga awan ti mabalbalinna.

Ngem imbilangko dagitoy a pannubok ken karit iti kinatibkerko a mangtun-oy iti arapaapko.

Manong Danny, nagturposak ngarud iti elementaria a naimula kaniak ti pananglais ken panangparigatda kaniak.

Simrekak iti first year iti Diffun High School.  Tapno adda mainayonko iti balonko a kuarta, inan-anusak ti timmulong kadagiti dadakkelko iti trabahoda iti talon.  Agbasbasa met dagiti dua a manongko iti CNSAT iti Cabarroguis agsipud ta nabiit pay a naipatakder ti DHS.  Masansan a makisalip da manong ken ni kasinsinmi nga Angelo iti isports ket nagab-abakda.  Nalaingda iti pole vault, long jump ken track and field. 

Gapu iti pammadayaw a maiyuk-okkor kadakuada, naawisak met a makisalip iti district meet ti pagadalanmi. Track and field ti nakisalipak.  Nangabakak, manong.  Agingga a nailabanak iti SCUAA, IRAA ken iti Palarong Pambansa.  Nakadanonak iti nadumaduma a probinsia kas iti Naga City.  Uray ni Insan Angelo,  napan nakisalip idiay Iloilo City idi naangay sadiay ti Palarong Pambansa idi 1991.

Nakagun-od ti kasinsinko iti gold, silver ken bronze medal.  Saanak met a nagpaudi, manong, adda met nagun-odko a medalia iti inkami panakiay-ayam.

Naragsakkami ta naipakitami nga adda kabaelanmi… a saankami a mennel.

Wen, Manong Danny, iti isports ti nakaidayawan ti pamiliami a Gacusan iti ilimi a Diffun.

Idi agturposak iti high school, siak ti napadayawan nga Athlete of the Year.  Nalapunosak iti ragsak idi maiyaspili ti medalia kaniak. Idi agsabat ti matami ken ni Ma’am Madronio, saan a nakatimek, ket nakunak iti bagik, naamirisna ngatan a saan a mennel dagiti ag-Gacusan.

Wen, Manong Danny, desididoak a siak ti umuna nga ag-Gacusan  ditoy ayanmi a makaturpos ti karera, saan nga agnanayon nga aglaklako laeng iti nateng ken kumarkaramut iti daga.

Intuloyko ti nagbasa iti Quirino State College.  Nangalaak iti kinapolis.  Nupay dakkel ti magastosko gapu ta ad-adayo ti pagadalak, inanusak, manong.

Narigat ti trainingmi ngem naisaganakon ti bagik. Idi addaak iti high school, nagbalinak a  PMT Officer.

Wen manong, agpayso la unay nga adu ti pannubok ken rigat a naglasatak sakbay a naileppasko ti kinapolisko.  Adda dagiti panawen a seknannak iti pannakaupay ken panagduadua ngem pinapigsak ti panunot ken pakinakemko babaen ti panagkararagko iti Namarsua. Ti Apo ti nagbalin a kamangko kadagiti panawen nga aglalabbet dagiti pannubok nga agpanggep a mangibalat iti kinatibkerko.

Ita, maysaakon a naan-anay a polis.  Naragsakak, manong, nagsam-it gayam ti balligi kalpasan dagiti karit iti biag.

Manong Danny, addaanak metten iti asawa, maysa a maestra, ken dua ti annakmi.  Kanayonko nga ipalpalagip kenkuana a dina tagibassiten ti kabaelan dagiti marigrigat nga ubbing.

Ken manong, saan laeng a siak ti nakaturpos kas polis, karaman pay ti kasinsinko a babai.  Ket no ipalubos ti Apo, iti sumarsaruno a tawen, saan laeng a dua no di ket ad-adu pay a Gacusan ti makaadal.

Ala kastan, Manong Danny, gibusakon toy pakasaritaan ti biagko. 

Ibatik man ti ballakad kadagiti kadagiti padami a marigrigat iti saanda a pannakapukaw iti namnamada. Agkammatalektayo ken ni Apo a Namarsua, agkiddawtayo kenkuana ket dinatayo baybay-an.

Agyamanak unay iti panawenmo a nangbasa iti daytoy a suratko.

                                        Toy pagayammo,
                                        Jerry Gacusan