Footer

ITI INDAYON NI LAGIP: Pannubok (Umuna a paset)

Sakbay ti amin, alaek man daytoy a gundaway kumablaaw kadagiti naayat nga agdengdengngeg iti programam nga Indayon ni Lagip.  Adtoy man nga insuratko ti  pakasaritaak nga ibilangko a dakkel a balligik iti biag.

Manong Danny, idi agtawenak iti pito, inserreknak ni nanangko iti umuna a grado idiay Diffun Central School.  Naragsakak ta kayatko ti makaadal. Narigat laeng ti panagbiagmi, Manong Danny, ket karit dayta iti panagbasak. Kayatko ti makalung-aw iti kinarigat. 

Inan-anusanmi nga agkasinsin ti magna iti maysa nga oras iti ipapanmi panagbasa.  Kadagidi a  panawen, saan a makadanon ti lugan iti lugarmi ta no palausen ti manarita, kasla naglubnakan iti nuang ti dalan. No panagtutudo, agkapitakan ti dalan ket ibakriwmi ti sinelas ken libromi a nabungon iti plastik iti tengngedmi ket agsakasakakam a magna sakamto agbuggo iti pay-as iti asideg ti pagadalan.

Wen, manong, gapu iti kinaadayona, agbalonkami ket iti aldaw, agsasangokami nga agkakasinsin a mangaldaw iti likudan ti pagadalan.  Tunggal maysa, adda balonna a naginnakkub a plato a nabalkot iti panio. Nanumo laeng ti balonmi a tuyo, itlog, sangkailgat a sardinas wenno bugguong lattan.  Naragsakkami ta kayariganmi ti agpipiknik. Agbibinninglaykami iti balonmi.

Wen, Manong Danny, sangkauyaw dagiti kaklaseanmi ti kinanumo ti balonmi ngem ngem diak intaltalek ida gapu ta agpayso met a marigrigatkami laeng, Kumarkaramut laeng iti daga dagiti dadakkelmi.  Pasaray awan balonenk a kuarta, ngem inan-anusak ti mapan agbasa gapu ta kayatko ti makaadal tapno saanto a mapadasan ti agbalin a pamiliak ti kinarigat a naglasatak.

No dumteng ti aldaw ti Sabado, tulongak da nanang ken tatang nga agpuros kadagiti nateng a mulami.  No di kabaelan ni nanang nga awiten iti kinaaduna, ipakok ti nuangmi iti  patoke ket daytoy  ti pangikargaak kadagiti nateng sako itulod iti tiendaan iti ili.

Pasarayko kaduaen nga aglako ni Nanang.  Kinatawaan ken inumsidak dagiti taga-ili a kaklaseak Ngem binay-ak latta idan no kasdiay nga uyawendak. Apay ketdin nga ibainko ti panangtulongko iti inak nga aglako iti nateng?

Idi addaakon iti maikanem a tukad iti elementaria, dimi napakpakadaan  ti isasangbay ti maysa a bagyo. Agsagawisiw pay ti angin idinto a kasla maibuybuyat ti napigsa a  tudo.  Nagdanagak ta sigurado a malapunos ti rangtay a dalanenmi iti panagawidmi.

“Ma’am, pangaasim, palubosandakamin nga agawid, bareng saan pay a nalapunos ti rangtay,” impakaasimi iti maestrami.

Ngem idi makadanonkami iti sungaban ti karayan, dimi metten makita ti rangtay. 

Dimi ammon ti aramidenmi.

“Diosko, isurom ti aramidenmi tapno makaawidkami a sikakaradkad iti pagtaenganmi.  Sigurado a madandanaganen dagiti nagannakmi,” inkararagmi.

Simmiplot iti panunotko a mabalinmi ti  manglikaw idiay Cajel.  Wen, Manong Danny, adda nangatngato a rangtay dita a pagballasiwanmi. Ngem madanagankami ta masipngetankami la ketdi iti dalan. Pinardasanmi ti nagna uray no narusepkamin iti tudo ken mangrugikamin a kumter iti lammin.

Nabang-arankami idi makadanonkami ta saan a nalapunos ti rangtay.  

Rinugianmi ti bumallasiw. Nainayad ti panagaddangmi tapno dikami maikaglis.  Sanggolenmi ti barandilias ti rangtay no dumuprak ti napigsa nga angin. 

Dimi napupuotan a nakalasatkami iti rangtay. Mangrugin a sumipnget ket dinagdagko ti kasinsinmi nga iparpardasna ti magna.

Arig taray ti pannagnami. Saanmin nga inggingina ti kutimermi. Pasaray maitibkolkami gapu iti kinagalis ti dalan.

Bayat ti panagdaliasatmi, nagkararagkami manen, Manong Danny, nga isalakannakami ti Namarsua iti peggad.

Gapu iti dayta a napasamak, simmadut dagiti dadduma a kalugaranmi a nagbasa.  Ngem imbilangko ketdi ti napasamak a maysa a pannubok,  Manong Danny. Gapu iti napasamak, ad-adda ketdi a simmaetak nga agadal.

Maysa nga aldaw, nasalawko ti maysa a kabarangayak a damagko nga agpapaay a serbidora iti maysa a panganan iti siudad.

Ngem anian, imbes nga isakitnak, kinuna ketdin a maipadaakto laeng kadagiti kalugaranmi a saan a nakaadal agsipud iti kinarigat ti panagbiagmi.

Manong Danny, makapleng dagiti balikasna. Nakariknaak iti sakit ti nakem gapu ta nagbaba ketdin ti panagkitana kaniak a kalugaranna!

(Maigibusto)