Footer

ITI INDAYON NI LAGIP: Sulisog (Tuloyna)

Anian ni ayat a talaga! Mannakabalin unay. Uray no marugpo ti amin, basta matungpal ti pagayatanna! Nabileg a talaga!

Gapu iti umukuok a gagarko ken ni Jim, saannak a nagkitakit a nakitulag kenkuana nga agkitakami iti plasa ti Candon City.  Imbatik ken ni Elma dagiti annakko iti daydi nga aldaw.  Kasla nabuntog iti panagriknak ti panagtaray ti nagluganak a minibus a mangitunda kaniak iti siudad ti Candon.  Aggagarak unayen a makakita ken ni Jim, manong Danny. Kailiwko unayen a makita ti langa ni Jim.  Guapo ngata?   

Diak napuotan a nakadanonak gayamen iti siudad ti Candon.  Bimmabaak iti Kalamayan.  Simmagpatak iti plasa ket binirok dagiti matak ni Jim. Babaen ti cellphone,  dinamagko no ania ti kolor ti suotna.  Imbagana a nakaaruat iti nalabaga a t-shirt ken nakapantalon iti ngumisit a maong ket adda nga agur-uray iti nagtimbukel a paglinongan iti katengngaan ti plasa.

Iti yaasidegko,  nasaripatpatak ti lalaki a nakatakder a simmango iti laud.  Adda pamuyaanna a mangguyugoy iti maysa nga anak ni Eba.  Adda kebba ti barukongko.  Immasidegak iti ayanna ket inturturedko ti nagsaludsod.

“Sika kadi ni Jim?”  Nagdakiwas dagiti matak iti pakabuklanna. Kulot ti buokna. Nabaneg ti pammagina. Kasla manutsutil ti matana a nakaperreng itan kaniak.

“Wen,”  kasla naipit ti bosesna a nakakita kaniak.  Immisem.   Nagkulibagtong toy pusok.

“Eh… siak ni Lea,”  natarantaak a simmungbat, Manong Danny.   Nagdinnakulapkami.  Nagkarayam ti koriente iti bagik a simmuknor ditoy pusok.  Iti dayta a darikmat, awanen ti lalagipak ken ni Rey a lakayko.  Nakabaluden ti riknak ken ni Jim. 

Inyawis ni Jim ti panagmeriendami iti maysa a pagpalamiisan.  Bayat ti panagmeriendami, adu dagiti bambanag a nagpatanganmi.  Kasla nailibayak iti naunday a tagtagainep. Addaak iti ayuyang ti parparmata a diak kayat a mapugsat pay.

Inyawisna ti panagbuyami iti sine idiay Stern Mall ti Candon. Diak nagkitakit. Idi umulikami iti pagsinean, immakliliak pay kenkuana. Nakariknaak iti pannakkel no kasdiay a matmatan dagiti babbai a masabatmi ni Jim.

Nalamiis iti uneg iti pagsinean ngem sumuksuknor ti bara iti sibubukel a bagik.

Pinispisel ni Jim ti dakulapko. Saanko nga inuksot. Madamdama, nariknak ti pannakairakus ti nabisked a takiagna iti abagak.  Nagkaradap dagiti naalikuteg a ramayna iti nakarit pay laeng a barukongko.  Nagkulipagpag ti riknak.  Nagbinnirok dagiti mawaw a bibigmi iti kasipngetan!  Naganangsabkami iti napaut a panaginnagekmi.  Awanen kadakami ti agdama a pabuya,  ket dimi napuotan ti panakaleppas ti pabuya.

Nagdalapdapen ti sipnget idi rimmuarkami iti pagsinean.  Agkiraykiray dagiti bituen iti nadalus a tangatang.

“Rabiin. Aggawidakon,”  nakunak.

“Aggawidka inton bigaten.  Inta  idiay balay uray ket asideg met ditoy,”  inyawisna kaniak.

Ammok lattan ti pagtungpalan daytoy a panagkitami. Ngem iti dayta a kanito, nagpukawen ti nasimbeng a panunotko. Saankon a napanunot nga adda dagiti annakko nga agur-uray kaniak, adda ni lakayko nga agtrabtrabaho iti siudad tapno maitedna kadakami ti naraniag a masakbayan.

Wen, diak nalapdan ti riknak, Manong Danny.  Iti dayta a rabii, immianak iti balay ni Jim. Iti agpatnag, nagpapaskami iti maiparit nga ayat. Dita a nananamko ti kasasam-itan a pagteng iti biagko. 

Intungtungkuak ti panaggawidko. Diak kayat a panawan ni Jim. Isun ti nagbalin a kapatgan iti biagko, ket awanen ti paset pay ti pamiliak.

Iti maikatlo nga aldaw, adda text kaniak ni Elma.  Binutbutengnak a no diak latta aggawid, ipulongna ken ni Rey a lakayko ti panangpanawko kadagiti annakko.

       (Adda tuloyna)