Iti kapanagan, nalunes dagiti sabong (Maikadua a paset)

COMFORT WOMAN! Naitanamitimna. Pagpalpaliwaan a babai! Nagdakesen a birngas! Ngem makasugat man iti rikna, dayta ti kinapudno!

Iti dayta nga immapay iti panunotna, kasla nabuttuonan ti barukong ni Nana Andrea. Minulenglenganna dagiti umarikiak a piek nga agtuktuktok iti irik. Nagngilangil. Uray dagiti piek, nakunana iti unegna, ammodan ti makisinnippit tapno mabukodanda ti taraon.

Naisipna: Uray iti lubong dagiti dingnguen, masursurot latta ti linteg ti kabakiran. Bagina ikalakagna. No dika makirinnupir, saanka nga agbiag!

Simrek iti kadaklan. Innalana ti buyboy iti likudan ti rikep ket sinagadanna ti salas. Agkaiwara dagiti ay-ayam ni Jun, ti bugbugtong nga apokona. Awan ita dagiti agama ta napanda nagdigos iti karayan. Aglutluto ni Saling iti pammigatda.

Sangkapagel ni Erning nga agtrabaho iti uneg ti balay. Bay-am lattan a ni Immang ti agdalus, sangkakunana. Ngem inkalinteganna nga ad-adda a kumapsut ti bagina no awan ti kuditenna.

Pinunasanna dagiti naikuadro a ladawan a naisab-it iti diding. Is-iseman da Erning ken Matilde. Naala ti ladawan idi agturposda.

Immanges iti nauneg. A, ti panawen ti kinaagtutubo! naisipna. Panawen a namsek kadagiti arapaap!

Dina naaluadan ti ililidem ti rupana ta agdadarison dagiti lagip. Ngem ania koma ti agdama no awan ti napalabas?

Nalagipna ni Anita Henson. Adda kalintegan daytoy. Narakrak ti masakbayanna gapu ken ni Kapitan Agamoto. Kayariganna ti sarming a linittikan daytoy ket uray ania ti aramidenna tapno mabukel manen, saanen a maisubli pay iti sigud a kasasaadna. Kupikopanna kadi lattan daytoy a kinadamsak?

KINADAMSAK! Iti tawenna a sangapulo ket lima, ganggannaet kenkuana dayta a balikas. Nupay simple ti pagpuspusiposanna a lubong, namuli iti ayat ken pammateg.

Saan a panangibuat iti bukodna a bangko, adda pamuyaanna. Paneknekan dayta ti masansan a yaarubayan da Lising, Torio ken Abat. Ngem dina intaltalek dagiti pasablog ken parimrimda. Napatpateg kenkuana ti adal. Kalpasan ti panagturposna iti sekundaria, panggepna nga ituloy ti panagbasana agingga iti makaturpos iti kinamaestra. Makauray ni ayat, nakunana.

Ngem dimteng ti gubat ket nagkampo da Kapitan Agamoto iti Sta. Barbara. Dina impagarup a sipsiputan met gayam daytoy ti panagbukarna a kas sabong.

Maysa a malem a panaggawidda ken Indang a napan nagkayo, sinaed ida ni Kapitan Agamoto. Iti baet ti panagpakpakaasina, pinuros ni Kapitan Agamoto ti kinababaina.

Sinangsangitanna a siulimek ti pannakaidadanes ti dayawna. Ngem ania ti maaramidna? Nabileg ni Kapitan Agamoto. Impangta daytoy a paibaludna dagiti nagannak kenkuana no dina pagustuan ti pagayatanna.

Tallo a tawen….

TALLO A TAWEN, naitanamitim ni Nana Andrea. Iti dayta a panawen, kayariganna ti balud dagiti ingget sipnget a rabii iti let-ang ti gartem!

Babaen ti puersa, impakni ni Kapitan Agamoto ni Nana Andrea iti kampo. Nadatnganna ditoy da Lucing, Pining ken tallo pay a kataebanna. Kagangganusanda amin. Ni Lucing ti kaubinganda ta agtawen laeng iti trese. Disinuebe met ti tawen ni Pining a kabaketanda.

Iti aldaw, awan dumada iti tagabo: agdalus, agluto, agpakan. Uray dagiti uniporme dagiti soldado, isuda ti manglaba ken mangplantsa.

Iti rabii, sabali manen a panagsagaba. Uray kasano a bannogda iti agmalem a panagtrabahoda, saanda a makakedked no sumrek lattan dagiti Singkit ket guyodenda  ti asinoman a magustuanda. Ni Nana Andrea ti napili ni Kapitan Agamoto a mangserbi kenkuana.

Ammona lattan no kasapulan ni Kapitan Agamoto. Iti sarsardam, asitgan ni Sarhento Iguchi sana ibilin ti panagdigos ken panagpapintasna. Iti eksakto alas otso, addaytan ni Sarhento Iguchi a mangsukon kenkuana sana itulod iti siled ni Kapitan Agamoto.

Naggaringgen ni Nana Andrea. Kasla marikriknana manen dagiti narusanger a dakulap ni Kapitan Agamoto nga agdakdakiwas iti nadumaduma a paset ti bagina.

Nagkitem ti bibigna. Apay a di maawatan da Erning ken Matilde? Ngem tinallikudan pay ni lakayna a sumaranay koma kenkuana, dagitinto ketdin annakna?

No marikna koma da Erning ken Matilde ti saem nga itden ti kaawan gawayna a mangisuko lattan iti kinababaina tapno pagparausan ni Kapitan Agamoto santo kasla abalbalay nga ipalladawna kalpasan ti panagpapasna!

Pinadas ni Nana Andrea nga iwalin dagiti agdadarison a lagip babaen ti panagkaykayna iti paraangan. Adu manen dagiti naluom a bulong a rinuros ti angin. Inummongna dagiti bulong iti sirok ti mangga sana pinuoran. Mangrugin nga agsabong ti mangga.

Nagpardas nga aglabas ti panawen, nakunana iti unegna. Bukel laeng ti mangga nga immula ni Erning. Pakalaglagipan idi aldaw a yuulida nga agassawa iti agdama a pagtaenganda. Ita, agbungan.

Naisulek ti matana kadagiti agtataray a kuton. Adda gayam balayda iti lukong ti nagrungarong a ramut. Nabuak dagiti kuton gapu iti pudot manipud iti mapupuoran a bulbulong. Sumagmamano a kuton ti linadam ti apuy!

Awan nagdumaanna, naitanamitimna. Isu ti kuton. Ket ni Kapitan Agamoto ti apuy!

(Adda tuloyna)