Iti Korte Suprema ti yan ti respeto dagiti umili, saan iti Kongreso

Ni Tatang Lakay

 

Agingga iti saan nga agkir-in dagiti kongresista ken ti Korte Suprema iti natangken a pagbatbatayanda, di pagduaduaan nga agdungparda ket magubbuay ti pagamkan dagiti umili a krisis konstitusional iti pagilian.

Nangipaulog ti Korte Suprema iti status quo order mainaig iti impeachment complaint maikontra  ken ni CJ Hilario Davide, Jr. kabayatan a di pay naikkan iti resolusion ti petision dagiti sumagmamano nga agilinlinteg iti konstitusionalidad ti maikadua nga impeachment complaint.

Pagbatbatayan dagitoy nga agilinlinteg nga isu met ti pagtaktakderan ti Korte Suprema a saan a konstitusional ti maikadua nga impeachment complaint agsipud ta nairusat nga awan pay makatawen kalpasan ti umuna nga impeachment complaint.

Kuna dagitoy nga agilinlinteg a nalawag ti Konstitusion: sagudayenna a saan a mabalin ti agipila iti impeachment complaint maikontra iti maysa nga impeachable official iti nasursurok ngem maminsan iti makatawen.

Ngem ipetpetteng dagiti kongresista a nagpirma iti maikadua nga impeachment complaint maikontra iti chief justice nga awan ti hurisdiksion ti nangato a Pangukoman iti Kamara.

No patien dagiti agilinlinteg a pro-impeachment, naipaima iti Kamara ti bileg ken eksklusibo a hurisdiksion a mangirusat iti impeachment complaint maikontra iti chief justice kas sagudayen ti Konstitusion.

Kunada a nabatad dagiti pammaneknek maikontra iti chief justice ket masapul a sungbatanna dagitoy iti impeachment trial.

Ngem kas kuna ni Diputado Salacnib Baterina, maysa kadagiti nangkuestionar iti legalidad ti maikadu nga impeachment complaint, dakkel a pagrurupakan no adda hurisdiksion ti Senado a mangawat iti complaiant agsipud ta nairusat ti dua a complaint iti uneg ti makatawen a maisalungasing iti Konstitusion.

Napudot nga isyo ti legalidad ti maikadua nga impeachment complaint ket addan dagiti abogado a nagsanud a mangikalintegan kadagiti kongresista. Mapattapatta met nga ibabawi dagiti kameng ti Lakas nga agilinlinteg ti pirmada gapu iti pinataudna a kontrobersia.

Iti daytoy nga impasse, dakkel a milat ti parnuayenna iti pagilian.

Gapu iti inaramid dagiti diputado, ad-adda a bumaba ti respeto (abus ta nababa payen) dagiti umili iti daytoy nga institusion. No idiligmo ti kredibilidad ti Kongreso ken iti Korte Suprema, ad-adda a talken dagiti umili ti naudi-udi.

Ania koma ti maipagpannakkel dagiti Kongresista? Ti pork barrel nga agalingasaw iti bangsit ti tabana? Dagiti pinartuatda a linteg a kaadduanna a mangpabor kadagiti babaknang, negosiante ken interesda?

Kinapudnona, dakkel ti suspetsa dagiti umili ken mangisakit ken ni Davide a nairusat dagiti impeachment complaint maikontra kenkuana tapno maikkatan ti kredibilidadda a justices.

Rumbeng ngarud a salakniban ni Davide ti Korte Suprema kadagiti agpanggep a mangdadael iti daytoy nga institusion a makunkuna a maudi a kamang ti hustisia ken demokrasia.

Mainayon ditoy ti senario ti pannakausig ni Davide iti sanguanan dagiti senador nga awan ti pamalpalatpatanda iti linteg. Maikkan kadi ni Davide iti maikanatad, patas, ken nainkalintegan a pannakausig? Naimatangantayo          iti impeachment trial ni napadisi a Pres. Joseph Estrada nga iti baet ti kaadu ken kadagsen dagiti ebidensia maikontra kenkuana, nagtalinaed a bulsek dagiti maraem a senador a kakaduana ket nagbutosda, saan a gapu iti konsensiada no di gapu iti kinaasidegda ken ni Estrada.

Nakitatayo ti pinarnuay ti di panangipirpirit iti kinapudno: napasamak ti Edsa II a nakapadisian ni Estrada.#