Iti Kuadrado a Lubong ni Emmanuel (Maikadua a paset)

Sarita ni Salvador A. Espejo

Maikadua a Gunggona, Salip iti Sarita ti Economy Tours & Tavel, Inc.

 

Nakadanon iti ground floor. Apaglukatna ti ridaw, reprep dagiti empleado a simrek. Dandani awan itiitan iti uneg. Nakaragragsak dagiti empleado a nagpipinnadamag. Kasla awan imetda a parikut.

Nagsublisubli ni Emmanuel a nagitulod kadagiti empleado. Sa la bimmattaway ti aglugan kalpasan ti alas otso. Limmawa ti aangsanna.

Naggilap ti ground floor. Nagpababa ni Emmanuel. Lalaki ti kargana. Ti nakamusiig a rurog a nagbaklay iti kumpay a naimarka iti tisirt ti lalaki ti nangtukay iti imatangna.

“Pangitulodak kenka, boss?” inamadna.

“Iti seventh floor,” kinuna ti lalaki idinto nga inipigna ti bassit a lalat a bagna.

Bayat ti panaguyas ti elebeytor nga agpangato, pasaray taldiapan ni Emmanuel ti pasaherona a nakadalikepkep itan a simmango iti nakatangep a ridaw. Dina maawatan no apay nga immirteng ti riknana.

“Am-ammom ni Mr. Roman?” nagtimek ti lalaki.

“Wen, boss,” insungbat ni Emmanuel. “Isu ti general manager ti Reliable Promotions Agency. No adda pasken wenno piesta, ti ahensiana ti makaammo a mangted iti entertainers. Promoterkayo kadi?

Simmusop ti lalaki sana inridis ti rungrongna. “Nakautang ni Mr. Roman kaniak ket umayko singiren,” kinunana.

“Makalawasen a di simrek ni Mr. Roman iti opisinana. Damagko a nagbakasion.”

“’Su met la gayam a diak maranaan iti pagtaenganna.”

Nagtengda ti maikapito a kadsaaran. Rimmuar ti lalaki. Immuneg met ti dua nga agtutubo ket nagpaitulodda iti maikasiam a kadsaaran.

Nasiputan ni Emmanuel ti panangtiliw ti lalaki iti dakulap ti kakuyogna sana inarasaasan. Immisem ti babai ket kinuddotna ti bakrang ti lalaki.

Tiniped ni Emmanuel ti isemna. A, ti namaris a lubong dagiti agayan-ayat, naisipna.

Nagpababa ni Emmanuel idi maitulodna dagiti dua. Iti maikapito a kadsaaran, agur-uray ti lalaki nga agsingir iti pautangna. Awan kano pay ni Mr. Roman.

“Agsubliakto no malem,” kinuna ti lalaki, “bareng no maidaw-as ni Mr. Roman.”

Bambannogmo laeng, nakuna ni Emmanuel iti unegna., Adda dakkel a gapuna no apay a nagbakasion ni Mr. Roman. Nagdinamag ngamin nga isiksikat ti kabsat ni Malou de la Cruz.

Nagkarayam ti arigengen iti sibubukel a bagi ni Emmanuel idi sumiplot iti isipna ni Malou de la Cruz. Nakaam-ames ti ipapatay ni Malou. Agasem ti maikapito a kadsaaran a timmapuakanna!

Nagsasanga dagiti sayangguseng no apay a nagpakamatay ni Malou. Ngem limtuad iti panagpalutpot dagiti pannakabagi ti linteg a lima bulan ti sikogna. Ni Mr. Roman ti maatap nga ama ti ubing.

Iti lobby, lima a lallaki ti kapatpatang ni Andro, ti guardia. Madamdama, nagkukuyogda nga immuneg iti elebeytor. Saan a nailaksid iti imatang ni Emmanuel ti nagtammukol iti siket ti nabaneg a kinaabay ni Andro. Apay nga adda polis iti Empire?

“Itulodnakami iti eighth floor, Emmanuel,” kinuna ni Andro.

“Adda kadi dakes a napasamak?” inimtuod ni Emmanuel.

“Umayko arestaren ni Misis Milagros Acuy,” kinuna ti polis. “Adda inkuyogko a warrant of arrest.”

Saanen a nagusisa ni Emmanuel. Daanen a plaka dayta. Namin-anon a natiliw ni Misis Acuy? Ngem kalpasan ti sumagmamano a bulan a ‘panagpalamiisna’, agkalap manen ti Zenith Recruitment Agency nga imatmatonanna iti trabahador a mapan mangged iti Middle East.

Kaasida met, nakuna ni Emmanuel idi taliawenna dagiti biniktima ni Misis Acuy. Kapkapnekanna nga insalda dagitoy ti kaibatoganda a langit tapno makapanda iti ballasiw-taaw. Ngem anian ta kineltay ti manangallilaw ti arapaapda a naraniag a masakbayan!

Kalpasan ti panangitulodna kadagiti kargana, dimmaw-as ni Emmanuel iti maikasangapulo a kadsaaran. Dua a babbalasang ti kargana. Inyunegda ti makabang-ar nga ayamuom.

Daytoy ti pagsayaatan no dadduma ti pagsapulanna ta mabsog ti matana iti napintas a buya, naisipna, ket pinarukibanna ti kasla naukkisan a bawang a luppo ti dumna kenkuana a balasang a sumirsirip iti riang ti nakipet a paldana.

(Adda tuloyna)