Iti Kuadrado a Lubong ni Emmanuel (Maikatlo a paset)

Sarita ni Salvador A. Espejo

Saan a maputpot dagiti tao a bumaba-agpangato iti pasdek ket di napupuotan ni Emmanuel ti panaglabas dagiti darikmat. Idi kitaenna ti oras iti diding, dandani gayamen alas dose.

Immaweng ti sirena manipud iti city hall. Madamdama, nagsasarutsot dagiti empleado nga itulodna iti baba. Kaaduanna ti aggawid wenno mangaldaw kadagiti restaurant iti ballasiw ti kalsada. Dagiti agbalbalon manganda iti kantina nga adda iti ground floor.

Alas dose y media idi mangaldaw ni Emmanuel iti basement. Apagwarsina ti buggona, nagsubli met la iti puestona.

Sakbay ti ala una, napekpek manen ti elebeytor kadagiti empleado. Kasla aggudaud a pag-ong ti elebeytor nga agibel-a kadagiti mangop-opisina iti tunggal kadsaaran.

Nakaanges ni Emmanuel iti nalukay idi bumattaway dagiti aglugan. Insadagna ti naktangan a bukotna iti diding tapno mainanaan.

Impalawlawna ti panagkitana iti kuadrado a lubongna iti walo a tawen. Nagsennaay. Nasursuronan nga impateg daytoy a lubong. Ngem inton bigat….

Simmiplot iti panunotna dagiti aggiina a pinanawanna. Kasanonton ti biagda bigat-kasangaldaw? Numona ta narigat ti agbirok iti panggedan ita a panawen. No ngay agpaprobinsiada a sangapamilia? Ngem pagsangladanda? Nalako metten ‘di amangna ti sangkakelleng a tawidna idi immay nakigasanggasat ditoy siudad.

Naggilap ti numero dies. Nagpangato ni Emmanuel. Inlukatna ti ridaw ket simrek ni Mr. Samuel Stone, presidente ti Anglo-Amalgamated Steel Corporation, a sinaruno ni Atty. Luis de Castro a nagbitbit iti attache case.

“Good afternoon, Mr. Stone,” inkablaaw ni Emmanuel.

“What’s good this afternoon?” nagsabat ti kiday ni Mr. Stone ket ad-adda nga immuyong ti nasidunget a rupana.

“Ibabanakami iti ground floor,” napilpilit ti isem ni Atty. de Castro.

Saanen a nagtimek ni Emmanuel. Pinindotna ti nalabaga a buton.

“You Filipinos are goddam hypocrites,” kellaat nga inwitwit ni Mr. Stone. “You want to eat even the palm that is feeding you.”

“I’ve tried to negotiate with Mr. Buccat but he is steadfast on his demands, Mr. Stone,” kinuna ni Atty. de Castro. “He threatened that the workers will continue with their strike if we do not accede to their demands for better pay and working conditions.”

“We are not employing you as corporate lawyer for nothing, de Castro!” timmangken ti timek ni Mr. Stone. “Do something! Talk tough! Tell Buccat the corporation is not a meek lamb that easily cowers into submission, understand?”

“Yes, I understand, Mr. Stone,” nagdumog ni Atty. de Castro.

“Ground floor, sir,” kinuna ni Emmanuel. Inlukatna ti ridaw.

Dadakkel ti askaw ni Mr. Stone a nanglasat iti lobby idinto a kasla uken nga umip-ipus ni Atty. de Castro.

Nagsennaay ni Emmanuel. Anian, mabugbugkawan gayam ni Filipino iti bukodna a pagilian, nakunana.

Naawis ti imatangna iti napudaw a babai a simrek iti pasdek. Nagsanamtek idi mailasinna ti babai. Ti bullilising ni Mr. Solsona, ti kahero ti Sunshine Marketing Company!

“Fifth floor,” kinuna ti babai. Inruarna ti bassit a  sarming sana sinirig ti rupana.

Kastoy kadin ti langa ni agtutubo iti agdama? naisip ni Emmanuel. Kasla batombalani a nangtaringguyed iti matana dagiti dua a munturod nga agpilit a rumkuas iti nakipet ken narasay a blusa a binagayan ti umel-el a pantalon a maong. Nalagipna nga agtapus ita ket umay la ketdi alaen ti babai ti abastona.

Nakadanonda iti maikalima a kadsaaran. Nagallon ti patong ti babai a nangsurot iti pasilio.

Agwingwingiwing ni Emmanuel a nangirikep iti ridaw sa nagpababa. Naguray iti itulodna iti ground floor.

Kellaat a naunnatna ti bukotna idi masaripatpatanna ti nalukmeg a babai a sumrek iti pasdek. Ni Misis Solsona!

“Iti fifth floor,” imbilin ni Misis Solsona. “Darsem!”

Nagtungpal ni Emmanuel.

“Masukalak la ida, irik-irikek ti rupada!” imper-ak ni Misis Solsona.

Agguni koma ni Emmanuel ngem naunaanna ti nagamak. Nadamdamagnan ti kinarungsot ni Misis Solsona. No makapungtot, uray sino ti agdepdeppa!

“Apay a sangkataliawnak?” inkusilap ni Misis Solsona. “Kumplotnaka ni Angelo, ania?”

“Ne, saan, Misis,” insungbat ni Emmanuel.

Apaglukat ti ridaw, bumanang-es ni Misis Solsona a nangbeltak iti pasilio nga agturong iti opisina ni lakayna.

Patay kang bata ka, nakuna ni Emmanuel iti unegna ken ni Mr. Solsona. Gerra patani la ketdi ti sumaruno nga eksena.

(Adda tuloyna)