Footer

Iti makatawen a panagserbina: 5,000 nga umili, natulongan ti Ilocos Sur Hotline

NARVACAN, Ilocos Sur – Nasurok 5,000 nga umili manipud agduduma a paset ti Ilocos Sur ti naserbian ken naipaayan iti tulong babaen ti programa iti radio nga Ilocos Sur Hotline manipud Septiembre 2009 agingga iti Hulio 2010.

Daytoy ti inwaragawag ni Charito “Chato” Alda, station manager ti DWRS Commando Radyo a pakaipatpatangatangan ti nasao a programa ti gobierno probinsial bayat ti pannakaiselebrar ti maika-11 a tawen nga anibersario ti programa idi Agosto 14 a naangay iti Barangay Margaay ditoy nga ili ken dinar-ayan ti nasurok 1,500 a tattao.

Kaaduan a taraon, agas, libre a konsultasion medikal, kasapulan iti pagtaengan ken tulong pinansial ti ipapaay ti programa kadagiti agkasapulan nga umili tunggal Sabado manipud idi nairugi daytoy idi 1999.

Karaman kadagiti dimmar-ay iti anibersario da Gov. Luis “Chavit” Singson, Vice Gov. Deogrcias Victor Savellano, SPM Jerry Singson, SPM Jose Bunoan Jr., SPM Robert Tudayan, SPM Chita Cordero ken Narvacan Vice Mayor Charito Zaragoza.

Nagtudo iti papremio a wheel chairs, saklay, sarukod, bagas ken grocery items para kadagiti nataengan, bag ken school supplies para kadagiti ubbing, agduduma nga appliances  ken premio a kuarta para kadagiti dimmar-ay ken kadagiti listeners ti programa.

Iti panagsarita ti bise gobernador, dinawatna ti agtultuloy a panangtarabay dagiti kaprobinsiaan iti Ilocos Sur Hotline ta daytoy ti maysa a programa a mangipaay iti kasapulan ti amin a sektor iti kagimongan.

Nagyaman met ni Reynaldo Peralta, presidente ti grupo dagiti senior citizens ti Narvacan, iti adu a naitulong ti nasao a program kadagiti nataengan.

“Sapay koma ta agtultuloy ti programa ken  panangtarabayyo kadakami a nataengan,” kinuna ni Peralta.

Dinawatna pay ti pannuporta ti gobierno probinsial iti gannuat ti grupo dagiti senior citizens babaen ti panangipaayda iti pondo para iti proyektoda a  mangtulong kadagiti saanen a makabael ken masaksakit a nataengan iti ilida.

Kabayatanna, inwaragawag ni Gov. Singson ti maysa kadagiti programana a mangipatulod iti agtrabaho iti ballasiw-taaw.

“Kadagiti mayat a mapan sadiay Morocco, libre ti panangipatulodtayo ken garantisado a makapankayo ta personal a gayyemko ti agal-ala. Masubaybayankayo pay bayat ti kaaddayo sadiay. Asideg metten sadiay ti Spain a mabalinyonto a pagbirokan iti sabali a trabaho no malpasyo ti dua a tawen a kontratayo sadiay,” kinuna ti gobernador.

Kinuna ni Singson nga agdepende iti kualipikasion ti aplikante ti  trabaho ken sueldo a maited kenkuana.#

, ,