Iti mata dagiti negosiante a ganggannaet

Tallo dagiti kangrunaan a problema a sanguen dagiti agibabaut iti negosio iti pagilian: korapsion, saan a kinasigurado dagiti probiso ti ekonomia, ken panagtultuloy dagiti polisia pang-ekonomia.

Dagitoy ti natratar iti Integrity summit nga inorganisa ti European Chamber of Commerce in the Philippines (ECCP) ken ti Makati Business Club itay nabiit.

Segun ken ni Shameen Qurashi, Presidente ti Philippine Association of Multinational Companies Regional Headquarters, Inc., kasapulan ti nadaras a panagdesision ken kaawan ti korapsion tapno napigpigsa ti Pilipinas a makibalubal iti rehion, saan ketdi a gapu iti kaadda iti nasayaat a mangmangged ken managsangaili a tattao.

Kinuna pay ni Qurashi a nababbaba ti Pilipinas iti imatang dagiti ganggannaet nga agipupuonan no maidilig iti Indonesia, Vietnam ken Malaysia.

Sabali pay nga opisial ti maysa a gunglo dagiti negosiante ti nagkuna a ti panagtalinaed ti proseso ti hudisial a bangen iti nasayaat a panagnegosio iti Pilipinas ti maysa pay a problema a sanguen ti investor.

Kunana a nupay maikanatad ti linteg, makitada dagiti lapped ken giwang iti pannakaipakat ken implementasion dagitoy a makaapekto iti nasayud a panaguyas ti negosio iti pagilian.

Kasapulan a marippuog daytoy nga imahe ti pagilian ken maatur dagiti nagkamtudanna, insingasing ti sabali pay a ganggannaet a negosiante.

Nupay kasta, makapabang-ar a mangeg manipud iti bibig dagitoy a negosiante nga ar-aramiden ti pribado a sektor ti kabaelanna a mangpukaw kadagitoy a problema a mangipaay iti panagguddeng kadagiti agibaut iti negosioda ditoy pagilian.

Ngem mangibati koma iti pagpanunotan dagiti agtuturaytayo ti imbalikas ni  Hubert d’Aboville, presidente ti European Chamber of Commerce in the Philippines: The image of the Philippines in the global market “is not what it should be.”

Iti ababa a pannao, nasayaat a pagibautan ti pagilian iti negosio ngem ti madi nga imahena ti mamagsarimadeng kadagiti ganggannaet nga agpuonan ditoy.

Saan koman a paginbubulsekan dagiti agtuturaytayo daytoy a kinapudno ket agtignay a mangatur kadaytoy a panagipapan.#