Footer

Iti nagsangaan ti dalan 1 (Maudi iti dua a paset)

Bassit a pagilian ti East Timor ket no ar-arigen, ubing pay a nademokratikuan a pagilian. Paset idi ti Indonesia sakbay a nagbalin nga agwaywayas a pagilian. Kinapudnona, naglasat ti Timor kadagiti adu a protesta ken demonstrasion tapno laeng magun-odna ti panagwaywayasna manipud iti Indonesia.

Napintas ti relasion ti Filipinas ken East Timor. Iti panagsapata ni Presidente Benigno Aquino III, maysa kadagiti timmabuno a sangaili ni Jose Ramos Horta, presidente ti East Timor.

Idi rimsua ti riribuk a namagpeggad iti talingengen ti puesto ni Pres. Horta, nangibaon ti Pilipinas kadagiti soldado a nagserbi a kas peacekeeping body iti babaen ti United Nations. Agingga ita, adda pay laeng dagiti Pilipino a polis a maibabaon iti nasao a pagilian kas paset ti peacekeeping corps ti UN.

Sakbay ti ipapan ni Daisy iti East Timor kalpasan ti pannakaruarna iti eksamen para kadagiti doktor, nagpaay a medical officer iti Philippine General Hospital iti tallo a tawen. Kalpasanna, immakar iti Department of Education iti Dibision ti Ilocos Sur. Ngem tallo laeng a bulanna iti nasao a dibision agsipud ta naglusulos iti puestona idi addan ayabna nga agtrabaho iti ospital iti East Timor.

Idi damo, ti laeng ammomi, adda asikasuenna iti Philippine General Hospital. Ngem nakaawatak laengen iti tawagna nga ipa-Manilami dagiti aruatenna ken dadduma a gamitna agsipud ta pettat ti panagbiahena a mapan iti East Timor. Nagaplikar gayam a mapan agtrabaho sadiay iti babaen ti sidong ti United Nations. Kasapulanda ti doktor iti ospital ti gobierno sadiay isu a pinagbiaheda a sigida.

Adda ni Daisy iti East Timor idi rimsua ti riribuk a kinasapulan pay ti yaarayat dagiti puersa ti United Nations tapno mapagtalinaed ti talna sadiay.

Ngem pinagkalmana ti riknami a natalged ti kasasaadda a doktor ta pangadaywen ti gulo iti ospital a yanda. Maysa pay a dakkel a nakabang-aranmi ti impadamagna a kaadda ti naka-standby a helicopter a madadaan a lugananda no kumaro latta ti riribuk sadiay.

Kalpasan ti kontratana iti East Timor, ninamnamami nga aginteken ni Daisy ditoy pagilian kalpasan a naglantip ti pusoda ken ni Marlowe ken naaddaanda iti anak.

Ngem itay nabiit, nakaawat ni Daisy iti email manipud iti Australiana a dati a kaduana iti ospital iti East Timor a panguluen itan iti pediatrics division a mangal-allukoy kenkuana nga agsubli nga agtrabaho sadiay.

Idi damo, inyaleng-aleng laeng ni Daisy ti awis ti hepe ti pediatrics iti ospital iti East Timor. Ngem napinget daytoy ket itay Abril, immannugot ti management ti ospital a maingato pay ti sueldona kas insentibona nga agsubli.

Mariknak ti aggubgubal iti panunot ti balasangmi. Kasla adda iti nagbaetan ti dua nga agtuptupa a bato.

Imbagak kenkuana a dinak pagdanagan ta adda met nabirokan ni mamangna a mangiluto, aglaba ken para tienda iti kasapulak.

“No iti panagkitam ket ad-adda pay a maisaganam ti naranraniag a masakbayan ti pamiliam nangruna ken ni Niknik, sige, go for it. Uray  dua wenno tallo laeng a tawen. Iti nagsangaan ti dalan ti biagmo, sika laeng ti makapagdesidir no ania a dalan ti turongem,” nakunak.

Idi dandani agtapus ti Mayo, sumagmamano nga aldaw  sakbay ti panagkasangay ni Niknik, kinapatangnak ni Daisy iti email.

“Go na go na, daddy. Gimmatangakon iti tiketmi nga agpa-Timor,” kinunana.

Ket itay Hunio 6, nagbiahen da Daisy, kuyogna da baket ken ti anakna. Immianda iti Jakarta airport, sada nagbiahe a napan iti Bali ket ditoy ti naglugananda iti eroplano nga agturong iti East Timor.

Bayat a sursuratek daytoy, nagtext kaniak ni Daisy a nakasangpetdan iti Timor. Impadamag met ni baket a makiay-ay-ayamen ni Niknik kadagiti annak ti Australiana a doktor.

Kaniak a biang, naulit manen ti historia. Kasta met ti nagdalanak, nasurok a tallupulo a tawenen ti napalabas. Iti nagsangaan ti dalan ti biagko, nabayag a nagsarimadengak agsipud ta nagpangaduaak iti direksion a turongek. Diak ammo no agpakannigid wenno agpakannawannak.

Kas kaniak, natalged ti namnamak a daytoy a desision ti anakko, masurotna ti nalinlinteg a direksion nga agturong iti naranraniag a masakbayanda a sangapamilia.#