Footer

Iti nagsangaan ti dalan 1 (Umuna iti dua a paset)

Itay nabiit, bayat ti panagbasak kadagiti artikulo a maipablaak iti Tawid News Magasin, nakaawatak iti email manipud ken ni Daisy, ti inaudi nga anakmi.

“Adda manen e-mailda kaniak, Daddy, idiay East Timor. Kayatdan a maammuan no awatek ti diayada kaniak. Awatek kadi?”

Pagsubsublienda ti anakmi nga agtrabaho iti ospital ti gobierno iti East Timor. Ngem saan a makadesidir ti anakmi.

Iti maysa a bangir, natalgeden ti kasasaadda nga agassawa. Nakagatangdan iti bukodda a balay iti maysa nga exclusive village iti Cainta. Addaanda iti anak nga agtawen iti tallo, naragsak nga ubing, bibo ken nasaririt.

Dua nga ospital, malaksid laeng ti maysa a kolehio iti Quezon City ti pagpapaayanna a kas medical officer ken agklinika iti asideg ti pagtaenganda. Dakkelen ti sapulna.

Opisial a polis ti asawa ti anakmi. Nangato metten ti saad ni lakayna ta naital-on a hepe ti maysa a dibision iti Camp Crame.

Kinapudnona, dakkel ti naurnong ti anakmi iti tallo a tawen a panagtrabahona iti East Timor.  Ti nasapulanda ken ni lakayna iti dayta a pagilian, (nagpaay ni Marlowe a kas kameng ti peacekeeping mission iti nasao met laeng a pagilian ken ditoy ti nakasangalan ti ayan-ayatda) ti inggatangda iti balay,  kotse ken alikamenda.

Ngem iti sabali a bangir, no mapan ni Daisy iti East Timor, dakdakkel ti masapulanna ta doliar ti sueldona. Indiayaanda iti dakdakkel a sueldo tapno maallukoyda nga agsubli. Saanna a problema ti paggiananna ta adda bungalow a bukodna a paggianan iti ikub ti ospital.

Ngem pampanunotenna siguro ti agbalin a kasasaadmi ken ni lakayna no mapan iti East Timor. Saan a bale ken ni lakayna ta adda katulongda nga agluto ken mangidalimanek kadagiti aruatenna.

Ngem ammok a siak ti nangnangruna a pampanunotenna no awatenna ti diayada iti East Timor. Agmaymaysaakton ditoy Vigan.  Panggepna ngamin nga alaen ni baket tapno adda met la talgedna a mangpanaw kenkuana no ag-duty iti ospital. Iti tawenna a tallo, kagargarawan ni Niknik. Kasta met a kadagitoy a tawenna, kasapulanna iti mangsursuro ken mangdamili kenkuana iti nasayaat a kababalin ken umno a panagbalikas. Retirado a mangisursuro ni baket ket saanto a problema ti panagsursuro ti apomi.

Adda met ketdi ni Jasper, ti inaunaan nga anakmi, ngem iti metten Mandaluyong a nakabase a kas website designer. Ngem nagabsuonan iti trabaho gapu ta adu dagiti proyekto nga awatna. Rabii ti panagtrabahona agsipud ta dandani ganggannaet amin  dagiti klientena ket iti daytoy a tiempo (aldaw ngamin iti pagilianda) laeng ti kaadda ti kontakna kadakuada.

No umay sumarungkar ni Jas iti Vigan, saan nga agbayag ta agsubli met laeng iti Manila gapu kadagiti appointmentna. Ikuyognan ti laptopna ket agtrabaho iti rabii.  Wenno iranana ti panagbakasionna iti Vigan iti panagpiesta ti siudad, kas iti Konbersion ni San Pablo a maang-angay iti Enero 25 a pakaselebraran metten ti panagbalin a siudad ti Vigan (Enero 21),  ken iti piesta iti Mayo.

Malaksid ngamin iti trabahona, agessem ni Jasper iti photography ket kangrunaan a panggepna iti panagpasiarna iti Vigan tapno agala iti retrato kadagiti tampok nga aktibidad iti piesta, kas iti Longganisa Festival ken Binatbatan Festival ken dagiti prusision a maang-angay iti Semana Santa nga ikabilna iti portfoliona wenno iti inaramidna a bukodna a website.

Kinapudnona, idi naitao ni Niknik, iti Greenwoods ti ad-addan a pagintekan ni baket. Uray no adda dua a katulongan dagiti annakmi, ibaybayag ni baket ti  agbakasion iti denna ti apomi agsipud ta makaay-ayo ti kinatarabitab ken kinapiliana.

No adda met wayak, dagusek ti agpasiar kadakuada. Ngem saannak unay a makapagbayag ta  adda ngamin bassit a pagiwarnak nga imatmatonak, ti Tawid News Magasin. Daytoy ti imparuarko idi nagretiroak a nagisuro iti elementaria, idi kanisangapulo ket lima a tawenen ti napalabas.  Nasuroken a maysa a dekada ti pagiwarnak iti babaen ti panangimatonko. Bassit laeng a pagiwarnak ngem ditoy ti nakaituonan ti panawenko agsipud ta nagbalinen a paset ti biagko, kas maysa nga agiwarwarnak ken mannurat.

Kinapudnona, idi nagturpos ni Daisy iti kinadoktor ken addan natalged a pagsapulanda ken ni Jasper, simmiploten iti panunotko nga ibbatakon ti Tawid News Magasin  tapno aginanaak metten ket iyawatko iti maysa a mapagtalkan a gayyem a padak a mannurat ken nangsupsuporta kaniak idi mangrugrugi pay laeng ken  saan pay a natalingenngen ti pagiwarnak. Ngem saan a natuloy daytoy a panggepko agsipud iti maysa a pasamak.

(Adda tuloyna)