Footer

Iti Nagsangaan ti Dalan 3c (Tuloyna)

Ngem naitungtungkua ti panagbasak manen iti masteral agsipud ta tumadogen iti high school dagiti annakko. Iti Divine Word College of Vigan ti nangituloyanda iti sekundaria. Narigat ti agpagadal iti pagadalan katoliko ta nanginngina ti tuition fee ngem iti public high school.

Ngem uray dakdakkel ti mabusbos iti panagadalda, iti Divine Word College of Vigan ti inkeddengmi a pagbasaanda tapno nasaysayaat a maisaganada para iti kolehio. Adu ngamin unay dagiti maipakumit a trabaho kadagiti agisursuro iti public high school ket mapaliiwmi a ti kalidad ti edukasion ditoy ti agsagaba.

Kayatmi nga iti nangatngato ti kalidadna ti edukasion nga iserbida ti pagbasaan dagiti annakmi ta uray idi babassit pay da Jasper ken Daisy Joy, addan dagiti pagilasinan a nasagudayanda iti kinasirib. Nasapada a makasarita iti nalinteg nga Iluko ken nadarasda a matandaanan dagiti kabarbaro a balikas a mangegda.

Kuna dagiti kapaspasigak a “tippingda iti daan a bloke” ngem kaniak a biang, adda kabukbukodanda a kinasirib nga ammok a no mapatanorda babaen ti nasayaat a panangidalan ken panangkibin, ad-adda pay a mapasantak ken kasla ubbog nga agbukuar.

Kinapudnona, dakami ngatan ti nagannak a saan a pulos a nagkaproblema mainaig iti panagadal dagiti annakda. Uray idi di pay agbasa da Jasper ken Daisy, makarekognisardan kadagiti balikas ken numero ken ammodan ti agbilang ken mangisurat iti naganda.

Idi la ngata Grade I ken Grade II nga insurok ida kadagiti leksionda. Ngem idi makatadogdan iti Grade III agingga iti Grade VI, saandan nga intulok nga isurok pay ida. Makaammodan a mangaramid iti assignment ken leksionda. Sadak la asitgan no saanda a kapkapnekan ti trabahoda.

No adda makunak a tinawidda kaniak, isu ti kinamannuratko. Nalaing nga agputar iti estoria dagiti annakko.

Idi Grade III ni Jasper, nakaaramid payen iti komiksna. Kumpleto nga estoria nga adda pay drowingna, caption ken balikas dagiti characters. Ammona payen nga aramaten daydiay panangibitin iti interes dagiti agbasa iti maudi a frame. Saanko nga insuro daytoy a teknik kenkuana; nasursurona babaen ti panagbasana kadagiti komiks.

Uray ni Daisy, napulido dagiti aramidenna nga essay. Dinaydayaw pay ni Miss Natividad Buenavista, nalaing a prinsipalmi iti Vigan Central School, gapu iti kinadalus ken kinasayaat ti trabahona.

Idi high school dagiti annakmi, saanda laeng a nagbalin a literary editor, nagbalinda pay nga editor in chief ti school organda. Adda pay la a dulinko dagiti sumagmamano a kopia dagiti school organda a nakaipalaonan dagiti sinuratda.

Kinapudnona, iti naminsan a panagukagko kadagiti daan a sinuratko idi naggianak iti Baguio City iti makatawen, nasukainak dagiti sinurat ni Daisy nga essay ken short short stories  a naisurat iti English. Adu ti atiwenna a mannurat iti panangpulinglingna kadagiti balikas a mangapros iti karirikna dagiti managbasa.

Nasukalak pay ti maysa a daniwna a naisurat iti English ken naipablaak iti maysa a magasin para kadagiti teens.

Maladingitannak laeng ta saan a rimmukbos daytoy a talento dagiti annakmi. Mabalin a gapu kadagiti adu a pakakumikomanda iti eskuela, naipasuli pay laeng ti panagsuratda, nangruna idi agbasadan iti kolehio.

Ngem itay nabiit, nariing ti essem ni Daisy Joy nga agsurat babaen ti Momchat iti Facebook nga inaramid ni Jas para kadakuada ken ni Monique nga anakna.

Naipalaon iti Momchat dagiti karirikna, paliiw, panagduadua, ragsak, ngatangata ken dadduma pay a topiko mainaig iti maysa nga ina iti pannakaipasngay ti anakna, bayat ti panagdakkel daytoy, dagiti “umuna” a balikas, addang, panagumbi, ken ania ditan nga anekdota a mangisangbay iti isem, ken pananglagip iti kaaspingna a pasamak iti napalabas.

Kas karasay ti arbis iti kalgaw dagiti sinurat ni Jas. Nupay kasta, sagpaminsan nga adda dagiti impatulodna a sinuratna a salaysay mainaig iti historia wenno dagiti lugar a kangrunaan a destinasion dagiti turista.

Kinapudnona, maminsan wenno mamindua iti makatawen nga ilak-amna manipud iti nainget nga iskediulna ti panagpallailangna kadagiti nasulinek a lugar ditoy pagilian  ken iti Asia  tapno laeng agretrato kadagiti maipagtangsit a buya ti nakaparsuaan, nabaknang a kultura ken kaugalian kadagitoy a lugar.

Saan a nailaksid kaniak nga agtartaray iti darana ti kinaartista ken kinamannuratna, kas maysa a web designer ken potograpo. Makita ti kinamannuratna babaen dagiti portfoliona ken kadagiti potograpo nga isu a mismo ti mangretrato. Metikuloso a kas kaniak ni Jasper, adda pay dagiti gundaway a mamin-ano a sublienna ti maysa a lugar iti isu met laeng nga oras tapno laeng retratuenna ti maysa a buya a maiyannatop iti panagraman ken pannakapnekna. Iti biangna, saanna nga iyawat ti maysa a proyekto nga inted dagiti klientena agingga iti kapkapnekanna a mapnek met dagitoy iti inaramidna.

Kasta met ti kinametikulosok. Madakamatko ditoy nga adda pay maysa nga insalipko a saritak a naminsangapulo nga inaturko agsipud ta tunggal basaek, adda dagiti paset a diak kapkapnekan. Makinilia pay laeng ti ar-aramatenmi idi ket makapatuok la ketdi ti panangbaliwko iti manuskritok tapno laeng ikkatek dagiti sagursor ti saritak wenno mangiballaetak kadagiti parapo a namnamaek a mangpabileg pay iti saritak.

Ngem iti kanito a naiwaragawagen a maysaak kadagiti nangabak iti pasalip, makariknaak iti naan-anay a pannakapnek agsipud ta iti “panagtuokko”, nakaputarak iti maysa a sarita a mabalinko a pagpannakkel ti kinapulido ti pannakaaramidna.

(Adda tuloyna)