Footer

Iti Nagsangaan ti Dalan 3d (Tuloyna)

Iti panangtaldiapko ita iti napalabas, maysa a pagteng ti itudok a namagbaliw iti direksion a turongen da Jasper ken ni Daisy Joy. Daytoy ti ginggined a nangduprak iti Amianan a Luzon a nakairamanan ti Baguio City idi Hulio 16, 1990.

Gapu iti dayta a didigra, dandani nadalupo ti Baguio City, saan laeng nga iti ekonomiana no di pay ti industria ti turismo. Rinibribu a tattao ti natay iti daydi a ginggined; nagbalin a maysa a nalawa a tanem ti Baguio City.

Iti dayta a malem, kalkalpas ti klase da Daisy Joy ket rumrummuar pay laeng iti campus ti University of Baguio idi dinayyeg ti ginggined ti siudad.

Kas naammuanmi kenkuana, nagtaray a nagturong iti Burnham Park ket nakitipon kadagiti padana nga estudiante a nangpalabas iti rabii ditoy gapu ta maamak nga aggawid.

Karkarton ti in-inutda a pinuoran tapno mapaksiatda ti lamiis iti agpatnag. Namrayanda ti nagkakanta, pinagtitipon ida ti maymaysa a rikna: ti mangiwalin iti panunotda ti kinadamsak a nangduprak iti siudad.

Naammuanmi pay nga iti nagpatnag, nagsangsangit ni Inang idi saan met laengen a sumangpet ni Daisy. Agingga ita, kasko la marikrikna ti narikna ni Inang iti daydi nga agpatnag, ti saan a maiwalin nga amak ken alindudua nga addan dakes a napasamak ken ni Daisy. Agingga ita, adda dagiti gundaway nga umappayaw iti panunotko dagidi negatibo a saludsod no anian ti napasamak iti balasangmi. Ad-adda a makapatay dagiti saludsod nga awan ti maarikap a sungbatda a mangisangbay koma iti uray sangkaballing a pakapnekan.

Pagsayaatanna, nairana a nagbakasion ni Jasper iti Vigan idi dinuprak ti ginggined ti Baguio City. Adda ngamin demonstrasion dagiti estudiante nga agbasbasa iti St. Louis College gapu iti pannakaingato ti tuition fee.

Iti pannakaginggined ti Baguio City, napukaw ti komunikasionmi ken ni Daisy ken kada Inang. Dandani nagpatnagak a nagmonitor iti radio uray sangkaballing laeng a damag maipapan iti Baguio. Naammuak ketdi a narba ti maysa a pasdek ti UB ket ti namagkullayaw kaniak, iti pay met building a nagklasean da Daisy iti dayta a malem.

Iti dayta a naammuak, inkeddengko ti ipapanko iti siudad tapno kitaek ti sasaadenda. Gasanggasaten, nakunak iti nakemko uray idi naammuak a napeggad ti sumang-at iti Baguio agsipud ta nagreggaay dagiti bantay ket  ginaburanda ti kalsada kadagiti kasla balay a bato, pitak ken natuang a kaykayo.

Pagbatbatiek ni baket ngem impapilitna ti isusurotna. Uray ni Jasper simmurot met.

“Ad-adda nga agnerbiosak nga agmaymaysa ditoy balay,” nakuna ni baket.

Limmugankami iti bus nga agpaabagatan sakam dimsaag iti San Fernando, La Union. Adda nadatnganmi nga agrubbuaten a bugbugtong a dyip ket kimmalabkabkamin a tallo. Pekpek ti dyip kadagiti padami a pasahero nga ammok lattan a kas kadakami a sumang-at iti Baguio tapno mapanda kitaen ti kasasaad dagiti ipatpategda.

No malagipko ita ti panagdaliasatmi nga agpa-Baguio, makariknaak pay laeng iti aliaw. Iti dalanmi, kasla kiniwar ti makapungtot a bileg ti aglawlaw. Naisualit dagiti natuang a kaykayo, dagiti narpuog a balbalay, dagiti naigampor a dadakkel a bato ken daga iti kalsada.

Nagpatingga ti luganmi iti ngatuen ti ili ti Burgos. Manipud ditoy, sinurotmi ti kalsada iti isasang-atmi. Ti makadakes, nagtudo ketdin ket naslepkami. Gapu iti lamiis, nagkutimermerkami. Naimbag ta adda dagiti naimbag ti panagpuspusona a lumugar ket pinainomdakami iti napudot a kape.

Agingga ita, kasla diak patien a napagnak ti kasta kawatiwat a kimmalipkipkami pay iti bakras ti bantay, kasta met a sumken kaniak ti aligagaw no malagipko ti yuusokmi iti sirok dagiti nagtutuon a dadakkel a bato a nagrissuod manipud iti bantay.

Saannak a managkararag a tao, ngem kadagita a kanito, nagkararagak, saan laeng iti pannakaiyadayomi iti peggad no di pay iti karadkad ti anakmi iti siudad a dimi ammo no anian ti kasasaadna.

Idi nakadanonkami iti ngatuen ti Irisan, adda sumungad a lugan. Inamparak nupay saan a para pasahero ti lugan. Pagyamananmi ta sinardengannakami.

Idi makadanonkami iti siudad, napakidemak pay idi makitak ti namsaakan ti ginggined.

Maysa kadi daytoy a palagip iti tao a nakalipatdan iti Dios? malagipko a simmiplot iti panunotko.

Dimsaagkami iti baba ti St. Vincent Church. Idi adda lumabas a van nga agpa-Quezon Hill, nakikalugankami.

Apagtadogko iti salas ti balay ni Inang, dagus a sinawar ti matak ti balasangmi idinto a sinaludsodko ti yanna.

“Addadtoyak, Daddy,” insungbatna sa rimmuar iti siledna.

Idi nangegko ti timekna, saankon a naigawid ti pannakakullaap ti matak!