Footer

Iti nasaknap a gubat, biktima dagiti maipit nga umili (Maudi a Paset)

Iti aniaman a paanagrurupak, adda latta dagiti maiparukpok a dara iti biang ti kasoldaduan ken iti kabusor ti turay. Adu a biag ti maibuis, adu a masakbayan ti maisakripisio, nangruna iti pamilia dagiti mapasag iti ranget ken adu nga umili ti maapektaran gapu iti pannakaipitda iti nagbaetan dagiti agrupak a puersa.

Saan a makaanay dagiti pammatalged ni Teodoro a maiwayat dagiti operasion a saan a maipasungalngal ti biag dagiti umili, agsipud ta maapektaran la ketdi dagitoy gapu ta mapadisida iti pagtaenganda, tarayanda dagiti sanikuada ken  pagsapulanda. Maymaysa ti kayat a sawen daytoy: sanguenda ti agkatangkatang ken nalidem a masakbayan.

Ita pay laeng, nasuroken a 14,000 nga umili iti sumagmamano a barangay iti Basilan ken Sulu ti nagbakuit. Manamnama nga umad-adu pay dagiti masalapon tnga umili iti panangikalawa dagiti soldado dagiti lugar iti panangsapulda kadagiti bandido.  Agbalin dagiti umili a biktima iti manamnama a panagrupak dagiti soldado ti turay ken dagiti terorista. Saan a malapdan ti pannakaipitda uray kasano kaannayas dagiti operasion a maiwayat.

Iti sabali a bangir, mapattapatta a makabusbos ti turay iti P1 bilion iti binulan no iwayat ti militar ti opensiba kontra kadagiti bandido wenno terorista iti Basilan ken Sulu.

Nakadeployen ti 5,000 a tropa iti Sulu ken 4,000 iti Basilan, segun dagiti opisial ti militar. Manamnama nga umad-adu pay dagiti soldado a maideploy kadagitoy a probinsia.

Iti daytoy a situasion, tapno masustener ti militar ti opensiba, kasapulanna ti dakkel a gatad para kadagiti kasapulan, armas ken dadduma pay a ramit a pakigubat a dakkel a pakakarsan iti pagbagasanna.

Kuna ni Senador Rodolfo Biazon a kasapulan ti kanayonan a pundo manipud iti Kongreso a mapattapatta iti nagbaetan iti P3 bilion ken P6 bilion para iti kanayonan a manpower ken ramramit. Ti rigatna, manipud iti innem agingga iti 12 a bulan santo maited ti pundo kadagiti tropa ti turay, segun iti senador.

Ken ni Senate Majority Leader Francis Pangilinan, nasaysayaat nga amang a busbosen ti P1 bilion iti pannakaipatakder kadagiti pabalay, pagadalan ken maaramat laengen para iti livelihood dagiti umilia ngem iti maigatang kadagiti “armas ken panagdadael ken kinadamsak”.

Iti statement nga imparuar ni Catholic Bishops Conference of the Philippines (CBCP) president Archbishop Angel Lagdameo, inyunay-unayna a kontra (ti simbaan) iti aniaman a kita ti kinadamsak.

“Saan koma a mangiwayat ti gobierno kadagiti nadamsak nga addang, nangruna ket dida ammo dagiti nagisayangkat (nangputol kadagiti marines),” kinuna ni  Arsobispo Lagdameo.

Inggunamgunam ni Lagdameo ti panangiwayat ti gobierno kadagiti tignay nga agtungpal iti kappia, ngem mangrugi daytoy iti panangibbetna iti kinadamsak. Kayat ti arsobispo ti pannakaipagna iti patangan para iti pannakarisut iti problema iti Mindanao.

Nainkalintegan ken sensible dagitoy nga apela dagiti nadumaduma a sektor a rumbeng nga alingagen ni Pres. Arroyo. Saan a kinatakrot ti agikay iti ranget no mainaig iti biag ken karadkad dagiti rinibu a tattao a manamnama a mabiktima iti gubat no adda pay nabatbati a pamuspusan tapno malapdan ti gubat.

Iti sabali a bangir, mangrugin a dumur-as ti ekonomia ti pagilian. Masigurado a maapektaran met no agtultuloy ti gubat iti Mindanao. Saan a maikanatad a ti pundo a para iti pagsayaatan dagiti umili kas iti pagadalan, kalsada, salun-at ken pabalay, maiturong laeng a paggatang iti armas a pangungaw iti sangkaballing a bilang dagiti bandido.

Ti saludsod: ad-adda kadi a  denggen ti Presidente dagiti opisialna iti militar ngem dagiti nadumaduma a sektor, nangnangruna dagiti umili a maipit iti panagrurupak dagiti puersa ti turay ken dagiti bandido nga Abu Sayyaf?#