Footer

Iti nasaknap a gubat, biktima dagiti maipit nga umili (Umuna a Paset)

NAPIGSA dagiti timek manipud kadagiti nadumaduma a sektor a mangidardarirag ken ni Presidente Gloria Macapagal-Arroyo  a paisardengna ti panagbalin a nasaknap ti gubat iti Sulu ken Basilan.

Dakkel ti pamkuatan dagitoy a sektor nga agapela iti Presidente iti sanguanan ti nabatad a balikas ni Armed Forces Chief of Staff, Gen. Hermogenes Esperon a determinado ti militar a mangiwayat iti all-out war maikontra kadagiti bandido nga Abu Sayyaf.

Kasaruno daytoy ti ballaag ni Pres. Arroyo kadagiti politiko a saanda a gundawayan ti situasion para iti bukodda a publisidad ken interes ken iti panangdawatna kadagiti negosiante iti itutulongda iti gobierno tapno agballigi iti pannakirupakna kadagiti terorista ken iti tignay pangkappia.

Kinuna met ni Defense Secretary Gilbert Teodoro a maiwayat dagiti operasion maikontra kadagiti bandido nga Abu Sayyaf iti Sulu ken Basilan iti wagas a saan a maipasungalngal ti biag dagiti sibilian ken ti proseso ti kappia.

Agtultuloy ti operasion kontra ti Abu Sayyaf ken managdakdakes nga elemento agingga iti saanda a sumuko, kinuna pay ni Teodoro.

Iti militar, maysa a karit ti panangsaneb dagiti kameng ti MILF ken dagiti bandido nga Abu Sayyaf kadagiti soldado ti turay a mangbirbirok idi ken ni Italiano a padi Giancarlo Bossi a kinidnap dagiti bandido. Saan a maako dagiti opisial ti militar ti trahedia aglalo iti sanguanan dagiti pammabalaw nga adda mapapati a panagliway iti biang dagiti opisial dagitoy ken iti alegasion a depektibo dagiti armas nga imet dagiti soldado a nagtungpal iti kaawan gawayda iti napasamak a rupak.

Iti panangibatad ni Esperon a sugodenda ti kabambantayan tapno parukmaenda dagiti bandido a nagisayangkat iti pannakaputol iti ulo dagiti Marines, kasla met la imbatadnan ti nasaknap a pannakigubat kadagiti kabusor ti turay iti Basilan ken Sulu.

Ngem iti umuna pay la nga engkuentro iti nagbaetan dagiti soldado ti turay ken dagiti Abu Sayyaf, dakkelen ti kasualidad iti agsumbangir a grupo.

Kadagitoy nga engkuentro, agarup 60 a tattao ti natay a pakairamanan ti 27 a soldao. Dakkel a bilang ti naibuis a biag iti pakpakauna pay laeng dagiti manamnama a panagenkuentro dagiti soldado ti turay ken dagiti bandido nga Abu Sayyaf.

Ngem kasta ti gubat.  Adu a biag ti maibuis.

(Maigibusto)