Iti panagaplaymo iti trabaho, idatagmo ti bagim a kas tagilako

KALPASAN ti graduasion, ania ti sumaruno nga aramidem? Aginanaka pay ket imasem a panunoten dagiti oportunidad a sumangpet iti biag kalpasan ti uppat wenno lima a tawen a panagrigrigatmo iti kolehio? Ala, adda kenkan no dayta ti kayatmo.

Ngem kadagiti dadduma, siguradoak a dagdagusenda ti agbirok iti trabahoda tapno inda metten maiyaplay ti inadalda iti eskuelaan.

Iti panagbirokmo iti trabahom, kasapulan ti panagaramidmo iti resume tapno mailakom ti bagim kadagiti kompania a pagaplayam nga agtrabaho.

Kas impablaak ti msn.com, tallo dagiti klase ti resume: professional, contemporary ken elegant. Uray ania kadagitoy a format, mabalin latta ngem nasken a liklikam dagiti saan a nasayaat a banag nga ikabilmo iti resume.

Kaadduanna kadagiti saan a naawat iti trabaho maigapu ta saan nga umisu wenno adda pakababalawanna ti resume nga inaramidda. Ngamin masarmingan wenno maaninaw dagiti human resource specialist (wenno officer) ti kompania wenno korporasion a sumrekam ti kinataom babaen kadagiti entries wenno insuratmo iti resume. Kaadduan ngamin kadagiti HR specialist ket psychology wenno sociology graduate ket dagiti panangtimbang ken panangadal iti kababalin dagiti tao ken dagiti umili ti nakaisentruan ti inadalda. Kadakuada, makitada ti katatao ti maysa nga aplikante babaen kadagiti entries iti resume.

Adtoy ngarud dagiti sumag-mamano a saan a rumbeng ken rumbeng nga isurat iti resume:

1. Panangiyulbod iti eksperiensa. Posible a maawatka iti trabaho babaen ti panangbalbala-tongmo iti resume kas iti panangikabilmo iti saan nga umno nga eksperiensa. Dayta ngarud ti aw-awaganda iti paimpress effect. Ngem no naawatka, saanka met laeng nga agbayag iti trabahom, ta matakuatanto met laeng ti inkabilmo a panagulbodĀ  kabayatanen ti inka panagtrabaho. No natakuatan a saan a pudno ti inkabilmo iti resume, maibaba ti kinataom, maimarkan iti sibu-bukel a kompania a maysaka nga ulbod ken saan a mapagpiaran. No tinto pay nakabasbassit a banag kas iti panagpirma iti resume ket ulbodemon, anianto la ketdin kadagiti dadakkel a transaction ti kompania a naikumit kenka? Dimo kunaen a saanto met laeng a maammuan ti kompania ti kinaulbod nga insuratmo iti resume. Tapno ammom, adda asosasion dagiti HR Specialist kadagiti amin a kompania ket agpipinnadamagda wenno agserbi a kas reference ti tunggal maysa kadakuada. Kasta met nga adda dagiti asosasion dagiti amin a manager, chief executive officers, executive officer ken personnel manager. Kasanon no agpipinnadamagda iti maipapan kadagiti empleadoda, ta kasta met a naynay ti topiko kalpasan ti agenda ti mitingda? Nasaysayaat laengen nga ibagam ti pudno, ta kaadduanna kadagiti korporasion ken kompania ket dagiti saan nga eksperiensado ti pilienda, kaykayatda a suruan dagiti empleadoda tapno iti kasta maisuro wenno magemgemanda dagiti empleadoda. Kaaduanna met ngamin nga eksperiensado ket dumakkel wenno dakkel ti panagul-ulona nga isu ti mangipaay iti saan a nasayaat a relasion ti employer ken ti empleado. Kadagiti met agdadamo, iti pay laeng objective ti resume, ibagamon a dagus a kagredgreduarmo laeng ngem sidadaanka a sumabak iti dayta a posision nga inka aplayan, a sidadaanka a makasursuro ken ipasiguradom a nalakaka laeng a makasursuro kadagiti kabarbaro a banag.

2. Typographic errors and misspellings. Negatibo ti paruarenna a banag dagiti biddut a pannakaimakinilia/pannakai-kompiuter ti resume. Karaman ditoy dagiti mispellings. No pinagmakiniliadaka (usually a mapasamak iti physical interview), wenno pinag-enkoddaka iti kompiuter, masapul nga awan ti mistek wenno wrong spelling iti trabahuem ta saan a kayat ti maysa kompania ti aramid ti maysa nga empleado a mistek-mistek! Amangan no pinagaramidnaka ti manager iti maysa a communication wenno report wenno journal entries ket adu met ti typo errors ken mispellings, aysus, amangan no pagsubliennaka pay ti manager idiay eskuelaan a nagadalam! Tapno maliklikan iti kastoy, nasken ti panagannad. No adda saanmo nga ammo ti spellingna, irefermo iti ABC ti kompiutermo ta sukatanna. No kompiuter ti usarem, naugedan iti nalabaga iti sirok dagiti balikas dagiti mispelled a balikas, kasta metten a berde kadagiti passive unay a binatog wenno sentence. No makinilia ti intedda kenka, mangitugotka iti bassit a diksionario wenno pocket dictionary a pagkitaam dagiti balikas a pagduaduaam iti spellingda. No adda saanmo nga ammo wenno sigurado ti spellingna a termino, saanmon nga usaren, mangaramatka laengen iti sabali a nalaklaka.

3. Cutesy-pie layouts and stationery. No agaramatka iti stationery ken naarte la unay a layout – first impression technique a kunada – nagbiddutka. Amangan no kuna pay ti HR ti sumsumrekam a kompania wenno korporasion a pa-cute laeng ti ammom. Aysus, para laeng kadagiti mangim-impress dagiti cutesy-pie layouts. Kadagiti met stationery, amangan no kunaen pay ti HR a para laeng dayta kadagiti love letter ken love notes! Saan a kasapulan dagitoy. Umanayen nga iprintam ti resume iti nadalus ken saan a nakusokuso a bond paper. Ta saan met a ti nagsuratam ti kitkitaenda wenno kasano nga insuratmo no di ket ania dagiti insuratmo a kualipikasion iti inka pana-ngaplay kadayta a posision.

4.Ā  Liklikam ti adu unay a pakasaritaan ti kabibiagmo. Siempre, saan a nobela ti sapsapulen dagiti HR, no di dagiti laeng ababa ken namsek a banag maipapan iti posision nga inka aplayan. Isu laeng dayta ti isuratmo ket awanen ti sabali pay.#