Iti panagdalapdap ti sipnget (Maudi a paset)

Sarita ni Salvador A. Espejo

“KASANGAY ni Lingling no bigat,” kinunak. “Ania ti isagutta kenkuana?”

“Makaammokan,” aleng-aleng ti sungbat ni Daniel.

“Adda bassit isaganak a pagraragsakan. Panggepko nga awisen dagiti kaarruba. Addakanto koma.

“Masapaak a sumrek no bigat. Adda dakkel a deal a risutek.”

“Ikarkarigatam, a, ti kumamakam iti pasken.”

“Diak maipanamnama,” kinuna ni lakay.

Kabigatanna, nasapakami a nakimisa ken ni Lingling. Nakapanawen ni lakay idi sumangpetkami.

Saanko nga impadpadlaw iti anakko ti madi a riknak. Diak kayat a dadaelen ti panagkasangayna.

Alas tres ngem di met la sumangpeten ni lakay. Nagteleponoak iti opisinana.

“Di kadi nagawid, ma’am? nasdaaw ti sekretaria ni lakay. “Itay pay la bigat a pimmanaw ta agsakit kan’ ti ulona.”

“Kasta?” nakunak laengen. Kasla mangetngetnget ti pusok a nangidisso ti auditibo.

Nagsangpet dagiti kataeb ni Lingling a kinakuyog dagiti dadakkelda.

Immarimbangaw ti paara-nganmi. Nagsasalip dagiti ubbing iti ay-ayam, kanta ken sala. Nayaw-awanko ti sakit ti nakemko gapu iti kinaparagsit ti anakko a mangasikaso kadagiti sangailina.

Sumipngeten idi aggawid dagiti sangaili. Nagsubli ti dagsen ti barukongko ta di pay simmangpet ni lakay.

Alas dosen ti rabii idi adda agbanurbor a lugan iti batog ti balay. Simmiripak iti nagbaetan ti jalousie. Tumtumpaw dagiti garikgik dagiti adda iti kotse iti kaltaang ti rabii.

“Inton bigat manen?” natimudko ti timek-lalaki.

“Wen, umayakto,” insungbat ni lakay.

Inlukatko ti ruangan. Naipasabat kaniak ti ingel ti arak.

“Diak kadi imbaga kenka a dinak ur-urayen?” kinuna ni lakay.

“Inur-urayka,” nagdalikepkepak. “Kayatdo nga agpatangta.”

“Ipabigatta laengen.”

“Itan!”

“Ibagam ngaruden ket makaturogakon.”

“D-daniel, naumaka kadin kaniak… kadakami ken ni Lingling?”

Di nagtimek ni lakay.

“Ibagam… adda kadi nagkurangak kenka?”

“Maturogta ketdin,” nagpusipos ni lakay.

“Sungbatannak!”

“Ta timekmo!”

“Dinak bugkawan!”

Kellaat, timmayab ti dakulap ni lakay ket nanalpaak ti pingpingko.

“Sige, patayennakon tapno mapnekka!” inyikkisko.

“Dika agsardeng?” inlayat manen ni lakay ti imana. Ngem dina naituloy. Naapputna ti ulona. Nagrupanget ket naarinuknok iti suelo.

Nagpaarayatak ken ni Ising ket nagtinnulonganmi nga impaidda ni lakay iti katre. Tineleponuak ni Dr. Sanches, doktor ti pamiliami.

Inamiris ni Dr. Sanches ni lakay. Ininyeksionanna.

“Kanser ti utek ti sakit ni lakaymo! Makatawen laengen ti kapaut ti biagna!” kinuna ni Dr. Sanches.

“Saan a pudno dayta!” nayesngawko.

“Imbilin ni Daniel a diak ibagbaga kenka,” intuloy ni Dr. Sanches. “Ngem karbengam met a maammuan ti pudno ita ta nasapa pay.”

SIDUDUNGNGOK a pinunasan ti ling-et iti muging ni Daniel. Nagmulagat ni lakay.

“N-nasakit kadi pay ti ulom?” inamadko.

“Nasayaaten,” insungbat ni lakay. “A-ania ti imbaga ni Dr. Sanches kenka?”

“I-impudnona kaniak ti sakitmo.”

Nabayag a di nagtimek ni lakay. Idi agangay, sinapul ti imana ti dakulapko. Nariknak nga immirut ti petpetna iti dakulapko. Napakidemak.

“D-dayta ti gapuna a nagbalbaliwak,” nagtigerger ti timek ni lakay. “Nupay agdara ti pusok, inaramidko dayta tapno maimulak iti panunotyo a dakesak. Kayatko a guraendak… tapno diyonto ladingiten ti isisinak…”

“Ngem di pay naladaw, Daniel,” nakunak idinto nga inem-emak ti agpilit a rumkuas a luak. “Adda pay makatawenmo. Naunday pay dayta a panawen a palabsem iti dennami. Ikarik nga aramidek… dakami ken ni Lingling… ti kabaelanmi a mamagbalin a nakallalagip ti maudi a tawenmo iti dennami.”

Nagkiremkiremak. Ngem tinerredko ti luak. Masapul a patibkerek ti nakemko. Masapul a naturedak. Gapu ken ni Daniel…#