Iti panagluom ti tawen, pumigpigsa ti pammati iti Dios

Natakuatan iti maysa a panagadal nga insayangkat ti Unibersidad ti Chicago nga imparuarda itay nabiit a kadakkelan a bilang kadagiti mamati iti Dios dagiti lallakay ken babbaket.

Iti daytoy a surbey, napagsaludsodan dagiti respondents iti nagduduma a tawen mainaig iti kalawa ti sakupen ti pammatida, manipud iti ateismo agingga iti napigsa a pammati iti Dios; ti panagbaliw dagiti pammatida iti unos ti panagbiagda; ken ti panagkitada iti nosion a maseknan ti Dios kadagiti tattao.

Karaman kadagiti nasurbey dagiti agindeg iti pagilian nga Australia, Austria, Chile, Cyprus, Czech Republic, Denmark, France, Germany, Britain, Hungary, Ireland, Israel, Italy, Japan, Latvia, The Netherlands, New Zealand, Northern Ireland, Norway, Philippines, Poland, Portugal, Russia, Slovakia, Slovenia, Spain, Sweden, Switzerland, ken ti United States.

Kas maibatay iti data manipud kadagiti surbey a naisayangkat idi 1991, 1998 ken 2008 nadakamat iti ngato a 30 a pagilian, natakuatan ti National Opinion Research Center ti Unibersidad ti Chicago nga iti average, 43 porsiento kadagiti napagsaludsodan nga agtawen iti manipud iti 68 ken agpangato ti nairut ti pammatida nga adda Dios no maikumpara iti 23 porsiento kadagiti agtawen iti 27 ken agpababa nga addaan iti napigsa a pammati iti Dios.

Linaon pay iti panagadal a nupay bimmaba ti pammati iti Dios iti kaadduanna a pagilian, saan unay  ngem ketdi, ngimmato pay iti pagilian nga Israel, Slovenia ken Russia a maysa idi a napeklan a di mamati iti Dios gapu ta komunista a pagilian. Kas naduktalan iti panagadal, iti daytoy a pagilian 16 porsiento ti ad-adduan a bilang dagiti non-believers a mamati itan iti kaadda ti Dios iti bilang dagiti mamati idi iti Dios a napukaw ti pammatida.

Iti United States, agdagup iti 81 porsiento kadagiti napagsaludsodan ti nagkuna nga agnanayonda a mamati iti Dios.

Saan a nakakaskasdaaw a kadagiti katoliko a pagilian a kas iti Pilipinas ket kangatuan iti pammati iti Dios. Ditoy Pilipinas, 94 a porsiento ti mamati iti Namarsua. Iti sabali a bangir, kababaan a porsiento dagiti mamati iti Dios dagiti agindeg iti Western Europe kas iti dati nga East Germany nga addaan laeng iti 13 porsiento.

Maarisit iti nasao a panagadal a kadakkelan a bilang kadagiti ngimmato ti pammatida iti Dios kadagiti tattao nga agtawen iti 58 ken nalaklakay wenno nababbaket.

Ania ti kayat a sawen daytoy a panagadal?

Ngumato ti pammati ti tao iti Dios iti panagluom ti tawenna. Iti ilalakay ken ibabaketna, dumteng ti pannakaamirisna nga agsalog ti pisikal a bagina ket dandaninan maungpot ti  dalan a nagdaliasatanna iti nawatiwat a tawen. Dumteng ti panangannugot a maysa laeng a mortal a tao, ngem magun-odna ti kinaimmortalidad iti sidong ti Mannakabalin a nangparsua kenkuana.#