Iti panawen ti ECQ… (Maudi a paset)

NAGBALIN a naulimek ti Purok Amianan iti simmaruno a tallo nga aldaw. Awanen dagiti arimbangaw iti kantina no kasta a malmalem. Nagbalin a kawaw dagiti lamisaan dagiti managsiat. Maragsakan koma ni Anton ngem mariknana metten a mawaw unay a maayusan iti arak ti karabukobna. Pinadasna ti immud-od iti sangabotelia nga arak-nipa ken ni Apong Elmer itay ngem saan a pinatgan ti lakay.

Awan naaramidan ni Anton. Ania ngarud, anusanna pay laeng ti lumidok iti kape no kasta a mabannog iti trabahona iti bangkag. Iti sabali a bangir, pagyamyamananna met ketdi no saan pay laeng a makalidok. No kasta ngamin a madanonan ti barkada ni Sabas a mangsisiat, kasta unay ti pakapaypay-anna.

Irugi a kantiawan ni Sabas no apay nga arak-nipa ti in-inumenna idinto nga adda kano met gin wenno ‘tay nalabaga a kabalio. Inton kuan, rugiandan a pagatangen iti pulotan ken mainum. Dina mabalin a paayen ti grupo ta pumapispis latta no kuan ni Sabas. A sarunuen dagiti barkadana.

Idi ngarud naminsan, rinantada iti bangkag. Manarimaan idi a pakpakanenna dagiti tarakenna a manok iti inaramidna a poultry iti suli.

“Dadakkelda gayamen dagitoy tarakenmo, pari,” inggabbay kenkuana ni Sabas. “Baka mabalin met ti rumaman iti kaldoda?”

“Babassitda pay laeng, bro,” kinunana idi. “Apagsurok pay laeng a sangakilo dagita kadadakkelan.”

“Mayat daytan, brad,” kinuna met ni Eric. “Kaim-imasanda!”

“Ala, mangpungoka man iti dua ta pulotantayo damdama ‘diay kantina,” kasla sigsigurado ni Rodel a nangitapik kenkuana.

“Saan, a, ta padakkelek pay ida, ‘Nong,” inkitakitna. Inauna iti tallo tawen kenkuana ni Rodel.

“Ne, agkitakit, Pari Sabas,” indusngiit ni Allon.

Awan sinsao, pinapispisan lattan ni Sabas. Napadiwig pay iti sakit a nariknana. Kayatna ti bumales ngem ania koma ti maaramidanna ket adda met kakadua ni Sabas. Napamesmes laengen.

“Adda reklamom?” inkilga kenkuana ni Sabas.

Ngem saanen a nagtagtagari. No duada la ken ni Sabas, ammona, nalaka la a padsuenna daytoy. Simmabunganay dagiti piskelna iti takiag gapu iti pannakariturna iti trabaho. Agpayso, nataytayag ngata iti lima a pulgada ni Sabas ngem adda raprapisna. Nalastog laeng ta adda dagiti barkadana a pagkaritna.

Napamalanga laengen ni Anton idi awan aniamanna nga innala ti grupo ni Sabas ti dua a netib a manokna. Agpullokayto, kinunkunana lattan. Maamak met nga agipulong ta uliteg ni Sabas ni Kapitan Aldong. Kas ken ni Sabas, adda dangdang-as ti kapitan. Al-alaenna ti kaanakanna no adda pakaisungalngalan daytoy a madi.

Kas iti daydi panangireklamo ni Ikit Miling ken ni Sabas. Imbaga ti baket a nakitana ti liklikudan ni Sabas a nagala iti bunga dagiti mulana nga utong. Permi kano a taray daytoy.

“Nakitayo iti rupanrupa, manang?” sinaludsod ni Kapitan Aldong ken ni Ikit Miling idi agsasangoda iti barangay hall.

“Saan, a, kapitan,” kinuna kano ni Ikit Miling, “ta nagtaray ngarud idi mapasungadannak. Ngem nalasinko!”

“Ayna, nakapsut ngarud ti pagtaktakderanyo. Likudna la gayam,” inngilangil kano ni kapitan. “Sa maysa, iti dayta oras a kunam, binaonko dayta a kaanakak nga agkali iti ube ta aramiden ni baket a halaya.”

Awan naaramidan ni Baket Miling. Ngem siguradona a ni Sabas ti nagala iti bunga dagiti mulana. Malasinna amin a gargaraw daytoy.

MALEM, madama a pasuyotan ni Anton dagiti kapigsana ti agsabong a mulana a kabatiti. Napaisem ta masiguradona a dakkel ti mapastrekna. Kangina ita ti nateng. Manmano dagiti sumrek a tagilako iti ilida gapu iti dayta ECQ.

“Agsiattay’ madamdama,” pagammuan ta nangngegna a boses ni Sabas.

Sinirip ni Anton ti lipit idinto a naglinged kadagiti mulana. Ti grupo nga agpayso ni Sabas ti sumungsungad. Adda nakasako nga iggem ni Allon. Nakaragragsakda man.

“Paggianantayo ngarud?” sinaludsod ni Omar. “Napudot ita dagiti polis kadagiti agiinum.”

“Malagipyo ‘diay kalapaw iti asideg ti piskeria da uliteg?” sinaludsod ni Sabas. Nalemmeng idiay.”

“No makitanatayo ni ulitegmo a kapitan?” adda panagduadua iti timek ni Rodel.

“Saan nga agunget daydiay. Ayabantayo pay ketdi, a. Mawaw itan iti arak daydiay… kasta metten dagiti adda iti babaenna nga agbambantay idiay tsekpoint.” Pimgaak ni Sabas. “Planok nga ayabantayo amin ida. Nagadu ‘toy pulotantayo a lames!”

Lames? Napakuretret ti muging ni Anton. Naggapu iti laud ti grupo ni Sabas. Maymaysa laeng ti ammona nga adda piskeriana dita. Ni Lakay Andro! Manmano a mabantayanna ti piskeriana ta nakapsuten. Adda idiay abrod dagiti dua nga annakda ken ni Baket Toking. Is-isudan nga agassawa ti agnanaed iti balayda.

Napangilangil ni Anton. Napan la ketdi kinalap da Sabas ti piskeria ni Lakay Andro! Sobra dagitoyen, nakunana iti nakemna. Ageltorkay’ koma ket! naidawatna pay ketdin.

Iti panagpakantinana iti dayta malem, apagisu la ketdin a nangngegna ti paggaak iti likud ti balay da Manang Nora agarup tallopulo a metro iti amianan ti kantina.

“Addan sa pasken dita yan da Manang Nora, lilong?” sinaludsod ni Anton ken ni Apong Elmer idi mayawat daytoy kenkuana ti sangabotelia a manteka.

“Kunam, barok, no madama ti kiwarda iti bisukol,” inlibbi ni Apong Elmer.

Bisukol. Ammona lattan a mahjong ti kayat a sawen ti lakay. “Ket no maipariten ti agsusugal, lilong.”

“Simro manen ti gagatel dagiti imada. Saandan a nasarkedan,” nagkimokimmot ti ngiwat ti lakay. Ngilangil a ngilangil. “Ipaturayda man daytan a malnaawanda nga agawid.”

“Apay, saan nga ammo ni Manong Lovern, lilong?” ti konsehal nga akinsakup iti purokda ti kayat a sawen ni Anton.

“Ammona, a, ngem kasano a tiliwen wenno ipulongna ida? Maysa manen kadakuada ni Marivic nga asawana!”

Agngilngilangil ni Anton. Pumanaw koman idi mapasungadanna ni Sabas a kaduana da Allon ken Eric.

“Lilong, ‘tay man iduldulinmo nga arak dita!” nagubsang a timek ni Sabas.

“Awanen, barok,” inrason ti lakay. “Maipariten ti aglako!”

“Adu la amin! Iruarmo ketdin dagitay ilemlemmengmo. Gulpienmin tapno awan ti idaddadanagmo a matiliw.”

“Agpayso nga adda ta diak pay naidispos amin sakbay nga adda dayta liquor ban a kunkunada. Ngem sipud idin, saanakon a naglako.”

“Isu ngarud, lilong, a gulpienmin…” indusngiit ni Eric.

“Kayatmo ta ibagak ken ni uliteg nga adda pay la lakom?” imbutbuteng ni Sabas.

“Ibagam latta,” makaungeten ni Apong Elmer. “Uray ta saanak metten nga aglaklako!”

Pinanggep ni Sabas a serken ti kantina ngem alibtak ni Apong Elmer. Nairikepna a dagus ti ridaw.

“Buisit!” intebbag ni Sabas. Kinugtaranna ti ridaw ti kantina.  “Ala,” inkitana kadagiti kaduana, “intayo iti sabali. Narigat ti mabitin! Numona ket adu pay dagiti pulotantayo. Ken umayto pay kano dagiti agbambantay iti tsekpoint ‘ton rabii ta naimbag la a pangbugiawda iti dudukot. Sa mawawda kano pay ket unayen, a!””

Aglablabeskayon, kinuna ni Anton iti nakemna. Nagawiden kalpasan a nasiguradona a napagkalman ni Apong Elmer ti riknana.

Dinaras a linuto ni Anton ti pangrabiida. Prinitona ti dua bukel a tilapia a nabanniitanna itay agsapa iti piskeria ni tatangna. Isagpawna dagitoy iti dengdengenna a bunga ti utong, bulong saluyot ken maruggi.

Agpalpalpan iti indayon iti sirok ti mangga idi nalagipna ti grupo da Sabas. Nagkubuar ti riknana. Kumarkaron dagitoy. Awan payen ti respetoda kadagiti nataengan. Maasian la unay itay iti pinagsasaoda itay ken ni Apong Elmer.

Innalana ti liwliw ni tatangna. Inappananna iti tukak-bat-og ket nagturongen iti alog iti abagatan. Kakabusna ket mayat ti agliwliw, nakunana iti nakemna. Tariigidenna man ti aripit iti ampir dagiti nagennegenned a piskeria. Adu latta ti lamesna ditoy ta no kasta a manglayus, agballasiw dagiti lames. Ditoyda nga agturong.

Addan maysa a naalana a dalag. Adda pay tallo a tukak-bat-ogna. Agalas nueben iti rabii.

Addan iti asideg ti piskeria ni kapitan. Nalawag ti kalapaw iti asideg. Nakitana ti grupo da Sabas a permi a rasawdan. Nailasinna pay dagiti dadduma a konsehal ken tanod a nakatugaw iti aglawlaw ti lamisaan. Kuatro kantos ti sangsanguenda.

Ket adda pay ni kapitan a kaduada!

Ammo lattan ni Anton a dagiti dadduma a konsehal ti nagbantay iti tsekpoint. Agsisinnublatda pay ketdi siguro.

Inyal-aludoyna ti nagsubli. Amangan no madlawanda ket ayabanda pay. Idi makagteng iti aripit a batog ti piskeria ni tatangna, intugawna iti rimmuok dagiti bayog. Inruarna ti selponna pangur-urayanna iti dumawi.

Madamdama pay, nakangngeg iti ungor ti lugan iti haywey uppat a pulo a metro laeng iti abagatan ti aripit. Napardas ti taray ti lugan.

Apagisu met a makapadawi pay iti maysa a dalag. Inkeddengna nga agawiden. Idi taliawenna ti daya, addan ikkis ken karibuso.

Napaisem.

Impatuloynan ti nagawid idi makapadawi pay iti maysa nga attasi. Inyiddana a dagus apaman a naisimpana dagiti naalana. Saanna pay a nairidep idi umariwawada iti tengnga ti purok. Permi a wangwang ti lugan dagiti polis.

Kinitana ti selponna. Addada text:

Naapputmin dagitoy agiinum, classmate. Aduda nga agpayso. Ken opisialyo pay dagiti dadduma. Delikado dagitoy iti DILG.

Linuktanna pay ti maysa:

Uray pay dagiti agsusugal, classmate. Dakkel ti maur-or a multa dagitoy iti kaaduda. Sigurado ti tip-mo! Ket nairidep ni Anton a nalag-an ti riknana. Siguradona a dinto ibaga ni Dexter nga isu ti nagtaudan ti impormasion. Bareng agnakemen dagiti nakemmeg. ●