Footer

Iti pannakakemmeg 4 gun running syndicate members, hepe ti polis ti Cabugao, padayawan ti Regl PO

SAN FERNANDO CITY – Kas panangbigbig iti panangpukolda  iti maysa a grupo a mapapati a kameng ti sindikato nga agilaklako iti armas ken matangdanan a pumatay, nairekemonda a maikkan iti pammadayaw ti hepe ti polis ti Cabugao, Ilocos Sur.

Naammuan manipud iti police regional office ditoy nga idadauluan ni Police Chief Supt. Leopoldo N. Bataoil a maikkan iti pammadayaw ni Police Chief Inspector Saturnino Ediong, hepe ti polis iti Cabugao, gapu iti dakkel nga akemda iti pannakatiliw ti uppat a lallaki a mapapati a kameng ti gun for hire ken gunrunning syndicate nga agdakdakiwas iti probinsia ti Ilocos Sur.

Kinemmeg ti nagtipon a bunggoy ti Regional Investigation Division (RID), Regional Mobile Group 1 (RMG1) ken ti Cabugao police nga impanguluan ni Ediong iti buy bust ken entrapment operation nga insayangkatda iti Pug-os, Cabugao, Ilocos Sur itay Agosto 16 da Val Luna Barlahan, 32, residente iti Barangay 1 (Canaan), Badoc, Ilocos Norte; Edgar Bernardino Llanesa, 32, residente iti Badoc, Ilocos Norte; Eugene Aganon Estabillo, 35, naasawaan, barangay kagawad iti Pinili, Ilocos Norte; ken Darwin Tolentino, 30, mannalon, agnaed iti Barangay 16, Badoc, Ilocos Norte.

Naipilaanen iti kaso dagiti suspetsa.

Naammuan nga inyawat dagiti operatiba ti punggos ti kuarta ken ni Estabillo a mapapati a bayad dagiti armas iti uneg ti White Toyota Lite Ace Van nga addaan  plate number UFA 887 a nagbalin a senial iti yaasideg dagiti dadduma pay a pannakabagi ti linteg.

Nakakumpiska dagiti polis iti maysa a Browning automatic rifle (BAR), cal. 30 nga addaan iti bipod ken assembly magazine a nagkarga iti 16 rounds a bala; 2 a baby armalite M-16 a nabura ken tampered ti numeroda; maysa nga ababa a plastic magazine assembly para iti M-16 armalite nga addaan iti 12 rounds a bala; maysa a camouflaged casing ti baby armalite rifle; 13 punggos a kuarta.

Nakaala pay dagiti polis iti maysa nga identification card a nainagan iti maysa nga SPO4 Antonio Barlahan manipud iti Badoc municipal police station iti Ilocos Norte provincial police office ken dua a Honda TMX a motorsiklo.

Mapapati a nakadlaw dagiti dadduma a kakadua dagiti suspetsa ket naglibasda babaen ti pannakipinnaltogda.

Nakemmeg ni Tolentino ngem nakalusot dagiti tallo a kakaduana.

Maiyawat ti pammadayaw ken ni Ediong inton Sept. 3 bayat ti selebrasion ti National Crime Prevention Week.#