: Iti Taaw ni Limdo: Maysa a Batibat; 5 Dodoitsu-Iluko | Tawid News Magazine - Weekly Ilocos News 📰

Iti Taaw ni Limdo: Maysa a Batibat; 5 Dodoitsu-Iluko

Tunggal agkannak ti pul-oy
Maukrit toy barukong
Natarumamis naipempen a kalman
Diak a matarayan
Anniniwan ni tarumpingay
Malmesakon mangliwengliweng a taaw
Arinebnebennakon dagiti dalluyon
Napuskol ti ulep a nangsallukob kaniak
Iti uneg napnuan burburtia a siled
Diak a masirayan ti lawag
Ket batibatennak
Ti naikur-it a kaibatogak

5 DODOITSU-ILUKO

1. Nadara a Rabii

Ti telon napisangen
Ket nadaraan ‘kamen
Ta ginalip ni manong
Pasmok a rabong

2. Nawaw ti Nabudo

Ket inkurkurnat’ budo
A kurang ni Abundio
Gineppas kanalbuong
Ti telon-basol

3.  Tallo Nga Anniniwan Iti Sellag

Narga’y pempen garami
Iti anangsab ‘ti dua
Napnek dag’ti naannad
A matat’ sibeg

4.  Iti Sirok ti Bangsal

Ti ungor ti dissuor
Nangawis iti puor
Ket nabukirad matat’
Lakay nabbasa

5.  Misterio Iti Kasabaan

Napnekda apagbiit
Nawayadanto manen
Inton makaawiden
Sangailida