Iti ungto ti masakbayan

di latta  mapulsot
ti saludsod a maasut
aldaw-malem nga agam-ampayag
makaukas alipuspos a saludsod
kasano a kunikonen ti sag-ot
iti pudonan ti biag?
agpatit manen ti pagorasan
sanaltek manen ti isungbat
ti utek a di sangbayan
sungbat maitutop a saludsod
kasano a  subaen di mapulsot
a kiro ti biag?

a, di mauma dagiti saludsod
addada aminen iti pudonan ti biag—
di latta masurotan iti pamay-an
iti kunikonen a sag-ot
iti kusokuso a saludsod
tapno matumpongan nga isaad ti umno
a pudonan ti biag

iti sep-ang ti masakbayan
ditoy a  kidemak ti saludsod
agmulagatakto ket imatangak
ti kusokuso a pudonan
ti makaukas alipuspos a saludsod
ti panungpalan…