sinursuran-banner-sqSinursuranNi Jobert M. Pacnis

Itta

MALAGIPYO pay ‘tay aw-awaganda iti bigao? Adda kadi pay agar-aramat iti kastoy kadagiti lugaryo, ka-Sinursuran?

Pagtaep ken pagibuyog ti kangrunaan nga usar ti bigao idi. Nakapatpateg a gamigam ken katulongan dagiti mannalon. Aglalo iti uneg ti nanumo a pagtaengan. Mabalin a pagurnongan kadagiti naapit a nateng wenno dagiti pagrekado.

Idi ubingak, napadasak met ti nagusar iti bigao. Paitaep ni tatang ‘tay kabaybayo a bagasmi tapno maikkat ti nailaok nga itta (ta saan unay a nadalus ti bayuen dagiti makina idi). Wen, a, ta nagalas met no naitta ti innapuy a maidasar!

Saan laeng idi a bagas ti maitaep. Uray pay dagiti dulin a bin-i ni tatang. Paitaepna no kasta nga isagananan nga imula. Addada latta ngamin no kua buotna nupay addada nailaok a nabilag a sili ti sairo a pangbugaw kadagitoy.

Wen, ti bigao, pangikkat kadagiti madi, kadagiti itta a nailaok.

Mayarig ngarud ita ni Police Major Gen. Guillermo Eleazar, hepe ti National Capital Region Police Office (NCRPO), iti maysa a bigao a pangtaep, pangikkat kadagiti itta iti grupoda.

Masao daytoy kalpasan a pinagsasawan, kinuelioan, ken intudotudona ni Police Corporal Marlo Quibete kalpasan a natiliw daytoy a ‘kotong cop’. Permi a pungtot ni Eleazar ken ni Quibete. Ipakpakatda ti linteg para iti pagsayaatan ti sapasap.

Ngem no apay nga iti pay grupoda ti pagtataudan dagiti aglablabsing iti linteg!

Ad-adda la ngarud a maitutop kadakuada ti internal cleansing nga isaysayangkatda. Tapno ngarud maikkat dayta panagduadua dagiti umili kadakuada, sisiyaatenda koma ti mangipakat iti linteg. Saanda a mangiddaddaduma.

No adda agbasol iti grupoda, rumbeng a matiliw, makasuan wenno maipataw ti rumbeng kadakuada.

Isu a di mababalaw ni Eleazar no apay a kasta la unayen ti reksionna idi makasangona ni Quibete! Daldalusanda ti gimong ngem antagayam iti pay grupoda ti yan dagiti rinuker!

Saan a rumbeng, kasta la ketdi ti yik-ikkis ti panunot ni Eleazar. 

Iti inaramid ni Eleazar, adu dagiti napagtamedna nga umili. Inanamonganda ti nagbalin a reaksionna ken ti dusa nga impatayna kadagiti nagbasol. Inikkatna ni Quibete ken dagiti kakaduana ken ti immediate a superior-na.

Ngem kas ninamnama, adda latta saan a pabor iti inaramid ni Eleazar. Panangrabngis kano iti dayaw ti maysa a tao ti inaramidna. Saan a rumbeng nga impakita pay iti publiko ti panangunget ken panangsitana iti suspek.  

Sabihin ninyo kay Eleazar, OK ‘yon! ngem kuna met ni Pangulo Rodrigo R. Duterte.

Nakasarak ngarud iti dakkel a suporta ni Eleazar. Mismo payen a ti pangulo ti nangayon iti inaramidna.

A panagkunatayo, rumbeng laeng met! Saan a maitutop a mabeybi dagitoy a kagrupoda nga agar-aramid iti maikaniwas. Isuda dagiti itta a mangdadael iti sibubukel a grupo no di mapungtil ti sara dagitoy.

No kaano pay ngamin a naingato, doble pay ketdi, ti sueldo dagiti Men in Uniform a makuna, isu met ti kasla panagadu latta ti bilang dagiti madakdakamat kadagiti maikaniwas nga aramid.

Isu ngarud nga impangato ni Duterte ti sueldoda tapno saan a mapanunot dagitoy ti ilegal nga aramid a mangsupusop kadagiti kasapulanda. Ngem kaskasdi latta a makadamagtayo iti pannakabagi ti linteg nga agar-aramid iti maikaniwas.

Isuda dagiti di mapmapnek iti aw-awatenda iti binulan!

Wenno pudno ti angaw no dadduma? Kasano kano nga umanay ti sueldo ti maysa a pannakabagi ti linteg no kasta a naynayonanna met latta dagiti babbaina. No maingato ti sueldona, mangnayon met iti suportaranna.

Awan latta ngarud no kasta!

Sabagay, adu latta dagiti napudno iti akemda a pannakabagi ti linteg. Ket kayatda a madalusan (internal cleansing) ti grupoda tapno dida mairamraman iti aramid dagiti kaduada.

Mamatida iti pagsasao da apong a no adda uray maysa a mailaok a nalungsot iti sangatiklis a kamatis, sigurado a ramaramenna a dadaelen dagiti napintas ti kalidadna.

Isu a nasaayat la unay ti inaramid ni Eleazar. Ipakpakitana a gone were those days a mabeybeybi dagiti aglabsing iti grupoda.

Ti laeng nakaay-ayat ditoy, wenno makapasuron, saan pay a naaldawan ti kaso ni Quibete, maysa manen a polis (maatap nga AWOL ken agus-usar iti sarukod gapu iti sagubanit) ti natiliw gapu iti droga. Ken ti polis a lider kano ti maysa nga scam! Sa ti pannakatiliw met laeng ti grupo dagiti polis a mangkotkotong iti asawa ti natiliwda iti buy-bust operation-da.

Wayawayaan kano dagitoy a polis ti asawa ti babai no itedda ti dawdawatenda a gatad—dakkel a gatad! Ngem nasirib ti babai. Nagpulong kadagiti namnamaenna a nalinteg a polis ket napasamak ti entrapment operation kadagitoy rinuker a polis.

Ania pay, di natiliwda a dagus ket saanda manen a nakalusot iti maitutop a dusada! Sabali manen a panagtamed iti liderato ni Eleazar!

No kastoy a kastoy ti mapasamak, awan ti pagturonganna no di maisubli met laeng ti talek dagiti umili kadagiti polis.

Wen, ta aklonenda man wenno saan, adu nga umili ti awanen ti panagtalekna no maminsan kadagiti otoridad. Dayta ket gapu met laeng iti bukodda a kapadasan iti ima dagitoy a pannakabagi ti linteg. Wenno kadagiti damdamag iti sibubukel a pagilian.

Agingga kadagitoy, nabara pay ngarud ti isyu iti dayta kunkunada nga EJK wenno extra-judicial killing. Asino ti makalipat iti napasamak iti estudiante a managan iti Kean a maatap a pinaltogan dagiti polis gapu ta natiliwda kano daytoy iti operasionda kontra-droga. Ti dakes, limmaban (a naynay a kasta ti damag) isu a napatayda.

Naimbag laeng ta addada saksi ken adda ala ti CCTV iti lugar a nakapasamakan ti krimen. Ket nakasuan dagiti suspek a polis!

Ti panagdalus kadagitoy nga itta iti grupo dagiti pannakabagi dagiti linteg, saan laeng nga akem ni Eleazar. Wenno dagiti padana a nangato ti saadna iti ahensiada.

Masao a makita koma ditoy ti saan a matmatay a damag nga addada latta maaw-awat a di kualipikado koma nga agbalin a polis. Isuda dagiti adda laeng am-ammona a nangato a tao iti uneg isu a kasta laengen ti kalaka ti pannakastrekna.

Dagitoy a kita ti polis, maitugotan nga awan ti panangipategda iti trabahoda. Saanda a nagdalan iti rigat ken proseso. Pagangayanna, kasla ay-ayam laeng ti akemda. Dida panunoten ti nagan, ti dayawda a nakapusta no mairamanda kadagiti dakes nga aramid.

Idinto a dagiti pudpudno a nagrigat, nagdalan iti proseso sakbay a nakastrekda iti ahensia, adda la ketdi panangipategda iti uniporme a suotda. Aramidenda amin a kabaelanda tapno di mamulitan daytoy.

Tapno dida maibiliang nga itta!

Kasta met a dakkel met ti maitulongtayo nga ordinario nga umili iti pannakadalus ti ahensia. Saantayo nga agbalin a bulsek kadagiti masaksian ken mapadasantayo a di maikanatad iti ima dagiti polis.

Agbalintayo a natibker a mangipakaammo daytoy kadagiti namnamaentayo a napudno iti serbisio. Papananna no di mapungtil ti sara dagitoy a rinuker no makitada ti panagkaykaysatayo nga umili?

Intayo makikayammet iti addang a mangitaep kadagiti itta iti gimong!