Iwagat ti Kinamanagbabain

Ni Arlane P. Manzano-Ellorin

ANIA, agkukotka iti suli no kasdiay nga adda sangaili ni Manongmo wenno ni Manangmo? Dika makapagaliwaksay nga agwaywayas? Amangan no dimo pay masolo uray mapan laeng gumatang iti tinapay iti asideg a panaderia?

‘Dim kunaen a mabutengka iti padam a parsua?

Kayatmo kadi nga iwagat dayta sobra a kuyegyegmo no adda baro a rupa a masagangmo? Nasayaat met ti kinamanagbabain no sagpaminsan, kabagis, ta kababain met no kaska la kadagiti dadduma a timmabla ti panagruprupada. Ngem narigat met no masobraam a banag payen a pakauy-uyawam. Ibagadanto pay ketdi a natangsitka la unay no dimo ammo ti makikadua!

Kastoy, ngarud ti kayatko nga ipadigo kenka, kabagis, barbareng pumuskol bassit ta rupam a makiinnapir kadagiti baro a papagayammo.

Rummuarka sagpaminsan, dimo itulok a pagsaputennaka ti kinamanagbabainmo. Rugiam a pasiaren dagiti kaarrubam, makitungtong wenno makigantilka nangruna kadagiti kakasinsinmo nga adda iti asideg.

Wenno, mapanmo met kumustaen dagiti nasinged a gagayyemmo ket awisem ida nga agpasiar iti parke. No adda mangawis kenka, patgam! Panunotem nga awan ti rumbeng nga ibainmo, padapada amin a tao.

Makipartisiparka kadagiti aktibidad iti lugaryo ket makikappengka met kadagiti organisasion iti komunidad. No agintereska iti isports, awan dakesna no padasem met nga ipakita ti inalatmo. Makaguyugoy met iti rikna no adda paboritom nga ayup, mabalinmo nga itugot iti papanam, makatulong daytoy a manggubuay iti maysa a napasnek a saritaan aglalo kadagiti saan unay nga am-ammo.

Ikarigatam nga ileppas ti adalmo, kabagis, tapno naturturedka met laeng a sumarang iti tao. Agbasaka met kadagiti nasayaat a libro, magasin wenno pagiwarnak tapno saanka a maudi no adda mapagpapatangan ti grupo.

Narigat ti nakanganga lattan a dumdumngeg, kunam sa. No ammom ti agpatang, adalem met ti dumngeg tapno naan-annayas met laeng ti langenlangenyo.

No adda makasapul iti tulongmo uray pay dimo am-ammo, dika agpaidam (aluadam laeng tapno dika met maisagmak!) Dimo ketdi pilpilien dagiti pakikaduaam. Ammuem a saan a magatadan ti pudno a gayyem.

Respetarem dagiti makapulapolmo tapno itedda met kenka ti respeto a kalkalikagumam. Aniaman nga impaaymo iti padam a tao, isunto met laeng ti isublida kenka, saan?”

Ti kasayaatan? Makiumanka ken ni Apo ket dawatem ti kaaddana a mangkibin ken mangkadkadua kenka iti sadinoman a papanam ken tapno iturongnaka kadagiti pudno ken mapagtalkan a pagayam.

Ngem, ne, saanmo a pakaidayawan no napuskol unay ti rupam. Nasayaat ti agpasig ngem no masubraam… ay! AGBAINka iti bagim.#