Jobs Fair, angayen ti gobierno probinsial

VIGAN CITY – Nasurok a duapulo a kompania ti makipartisipar iti jobs fair a maangay iti provincial capitol inton Hunio 1, daytoy ti impakaammo ni Human Resource Management Officer Mario Ruelos.

Kinuna ni Ruelos a regalo daytoy ni Gov. Ryan Singson kadagiti awan panggedan a kailianna kas panangselebrarna iti panagkasangayna.

Kabinnulig ti gobierno probinsial ti Department of Labor and Employment iti pannakaisayangkat ti job fair a manamnama a mangawis kadagiti rineprep nga agbirbirok iti panggedan.

Kinuna ni Ruelos a kasapulan a nakasagana dagiti aplikante a mangisubmite iti bio-data wenno resume-da, application letters, transcript of records, diploma, certificate of employment, no adda, birth certificates from the National Statistics Office, ID pictures ken  dadduma a dokumento.

Indagadag ti gobierno probinsial iti masapa a kaadda dagiti aplikante iti probinsial capitol agsipud ta manamnama a nakaro ti trapiko a bubuayen ti panaglulukat iti klase iti daytoy nga aldaw.#