Junk shop natakawan

VIGAN CITY – Maysa a junk shop ti sinerrek ken tinakawan dagiti mannibrong idi rabii ti Hulio 26 ket kinasakasda amin uray dagiti sensilio a naggian iti drawer ti lamisaan.

Iti pulong ni Dionisio Lim, 57, akinkukua iti Vigan Junk Shop a masarakan iti Barangay IV ditoy siudad, agdagup amin iti P20,000.00 ti kinurimes dagiti di pay nabigbig a mannanakaw.

Kinuna ni Lim a naduktalan ti panagtakaw idi mapan luktan ti katulongda ti opisina ti junk shop ket nakitana a nalukib dagiti bisagra dagiti dua a kandado a naikabit iti ridaw.Nalukib met ti drawer ti lamisaan a nakaikabilan dagiti kuarta.

Kinuna ni Lim a pinanawanda ti opisina iti alas 8:00 ti rabii ket naturogda iti bahay kubo iti likud ti junk shop.

Mapapati a kuarta laeng ti puntiria dagiti mannanakaw ta dida innala ti kamera ken ti TV. Naiwarawara dagiti naggian dagiti bag a mapapati a sinukain dagitoy. Kasta met a mapukpukaw ti aso ti biktima.

Nupay kasta, manamnama ti pannakabigbig dagiti mannanakaw agsipud ta adda CCTV a naikabit iti nasao a junk shop. Iti pannakaisurat daytoy, madama ti panangpalabas ti anak ti akinkukua ti nairekord iti CCTV.#