Junkshops, naisingasing a ma-regulate

MAGSINGAL, Ilocos Sur – Insingasing ti maysa a konsehal ditoy ti pannaka-regulate dagiti junkshops nga adda iti igid ti kalsada, nangruna iti national highway.

Insingasing daytoy ni Konsehal Emmanuel Tomaneng agsipud iti kapaliiwanna a dagiti junkshops iti igid ti national highway ket saan laeng nga eyesore no di pay makalapped iti naannayas a trapiko agsipud ta iti igid ti kalsada ti pakaibuntogan dagiti aglatlati a landok, metal ken dadduma pay.

Segun iti chairman iti committee on environment, iti abaga ti kalsada ti ad-adda a pakaiburandisan dagiti mailako a lanlandok a pakaigapuan iti trapiko.

Segun met ken ni Konsehal William Tacderas, adda provincial ordinance a kasapulan a maaladan dagiti junkshops a nagpuesto iti igid ti dalan ket adaptarenda daytoy tapno ma-regulate dagiti junkshops.#