Kaanakan ti manedier masuspetsa nagtakaw iti boarding house

BANTAY Ilocos Sur – Ti kaanakan ti manedier ti boarding house ti masuspetsa a nangtakaw kadagiti alikamen ken kuarta ti maysa nga agkaskasera idi Septiembre 13.

Naitudo ni Ben Mar Sta. Maria, naasawaan, ken residente iti Barangay Aggay, Bantay, a mapapati a nangtakaw dagiti alikamen ni Reymund Quitilen y Haban, 29, kitchen supervisor iti Hotel Luna, Vigan City, a pakairamanan ti Cannon camera nga agpateg iti P20,000.00, Samsung tablet nga agbalor iti P10,000.00, Diezel wrist watch nga agpateg iti P9,000.00 ken kuarta a P3,000.00 a naikabil iti bag ken naiparabaw iti ngato ti nakalukat a plastik a drawer.

Kaanakan ni Virginia Sta. Maria, manedier iti Tagorda Boarding House a kukua ni Perlita Tagorda, OFW, ken kasinsin ni Sta. Maria, ti suspek.

Segun iti report, nakariing ni Quitilen idi agarup 5:30 iti agsapa iti dayta a petsa ket nakitana a nakalukat ti ridaw iti kuartoda ken naduktalanna laengen nga awanen dagiti alikamen ken kuartana.

Mapapati a makastrek ken rummuar ti suspek iti uneg iti boarding house ket nakita daytoy iti nasao a pagkaseraan dua nga aldaw sakbay ti panagtakaw.#