Kaay-ayammo dagiti Animales diay Baluarte (Maudi iti dua a paset)

Salaysay ni Mancielito S. Tacadena

 Tunggal alas onse met iti bigat ken alas-tres iti malem, makitayo ni Stanley, ti baboy nga ammona ti agpinta ken agipakita iti agduduma a tricks. Kalpasan ti pabuya, mabalin met dagiti sangaili ti agpaala iti ladawan nga iggem wenno kaabayda dagiti animales.

The Butterfly Garden

Maysa pay a paset ti zoo ti butterfly garden a pakakitaan kadagiti nadumaduma ti klasena a kulibangbang nga agsisinnublat nga agdisso kadagiti agbukbukar a sabsabong. Iti tengnga, masarakan ti maysa a grotto. Adda pay pasetna a pakakitaan iti life cycle wenno nadumaduma a paset iti biag dagiti kulibangbang manipud igges agingga iti agbalinda a naan-anay a kulibangbang. Bayat ti panagtakdermo dita, pasaray agdisso dagiti kulibangbang iti abagam a kas man la confetti dagitoy a nagtinnag manipud iti ngato.

 

The Burning Bush

Kabayatanna no iti sardam, nalawag a makita ti napnuan kaipapaanan a burning bush a naimuntar iti roof deck ti pagtaengan ni Gov. Singson. Babaen kadagiti namaris a silaw ken dadakkel nga speakers, kas man la addaka iti daydi panawen a panangiyawat ti Dios ken ni Moses kadagiti bato a nakaikitikitan dagiti sangapulo a bilin. Nalawag a mangngeg dagiti balikas bayat ti naigidgiddan a panagrimat dagiti silaw. Gapu ta naipuesto iti kangatuan a paset, makita ngarud daytoy dagiti adda iti aglawlaw ti Baluarte.

 

Pakasaritaan

Nangrugi kas rest house ti Baluarte idi 1991 ket ditoy ti pangpalpalabasan ni Gov. Singson iti weekendsna. No dadduma, kaduana dagiti papagayamna, agay-ayamda iti clay shooting (naangay pay idi ditoy ti maysa a torneo iti clay shooting a nakipartisiparan dagiti asintado manipud iti Asia a pakairamanan pay ti Prinsepe ti Brunei a ni Bolkiah). Immuna idi a nataraken ditoy dagiti atap a manok, billit, banias ken sunggo. Gapu ta umadu met nga umadu dagiti sangailina, napanunotna ti mangipatakder iti sumagmamano a pasdek a mabalinna a pangsangailian kadagitoy agingga nga itay laeng nabiit, impatakderna ti kunana a retirement buildingna nga inawaganna iti Torre de Baluarte. Naala met ti naganna a Baluarte iti maysa a balikas iti Espaniol a kayatna a sawen teritorio, sakup wenno pagarian.

Ala, padasenyo man ti umay pumasiar ditoy tapno mapadasanyo met a kitaen ti ngayed ti lugar a saan laeng  a gagangay a zoo no di ket pagtaengan payen ni Gov. Chavit Singson. Awan pagdanagam iti magastos ta awan ti entrance fee a masingir no sumrekka. Uray ti panangusar kadagiti pasilidad ken panaglugan iti karitela a guyoden dagiti babassit a kabalio ket libre. Ken siempre no mairana nga adda sadiay ti gobernador, mabalinyo met latta nga asitgan tapno agpaalakayo iti ladawan a kaabayyo isuna.  Di kadi libren ti pasiarmo, adda pay baro a padas a maipadamagmo dita lugaryo!#