Footer

Kaay-ayammo dagiti Animales diay Baluarte (Umuna iti dua a paset)

SALAYSAY  NI MANCIELITO S. TACADENA

Nalpas manen ti tiempo ti tudtudo ket adtoy manen nga intayo pasangbayen ti Paskua. Kadagiti pamilia, sigurado a pampanunotendan no sadino ti napintas a pagpallailanganda bayat ti medio atiddog a bakasion iti opisina. Adda dagiti mapan diay Boracay tapno mapanda kitaen ti napudaw a kadaratan ken sumirpat kadagiti dayag nga agbilbilag iti igid ti baybay. Dagiti met medio agsalsalimetmet, mapanda agdidigos ken agpipiknik iti igid ti baybay. Dagitay adda iti siudad, mapanda agpalamiis kadagiti mall idinto a dagiti dadduma, mapanda mangan kadagiti napipintas a restauran. Ngem no maminsan, makauma met dagiti nadakamat a pagpallaingan. Isu nga adda dagiti mapan kadagiti lugar a dida pay nakapanan tapno padasenda met a palabsen ti bakasion iti sabali a wagas.

Ditoy Ilocos Sur, maysa kadagiti lumatlatak a pagpasiaran ti Baluarte Zoo. Nagbalinen nga atraksion ditoy dagiti nasurok limapulo a klase ti animal a matartaraken. Manipud kadagiti agduduma ti klasena nga ugsa, billit, peacock, ostrich, dagiti bantam a kabalio buaya, beklat ken uleg nga awan gitana, Palawan bear cat wenno binturong, adda pay dagiti animales a naggapu iti sabali a pagilian kas iti camel, alpaca ken pot belly pig. Adda pay dagiti exotic animals kas iti Australian bearded dragon, iguana, African hedgehog ken siempre pagtaengan daytoy ti Vigan’s big cats wenno tigre a paborito ti makinkukua iti Baluarte. Iti sungadanna nakapatpatak a makita dagiti letra a mangbukel iti BALUARTE kas iti HOLLYWOOD sadiay California. No addaka met iti kangatuan a pasetna, makitam ti pakabuklan ti siudad ti Vigan iti amianan ken daya ken ti nalawa a West Philippine Sea iti laud.

Ti zoo ket paset ti 80 ektaria a turturod a napasimpa tapno agbalin a pagtaengan ni Gov. Chavit Singson. Ngem gapu iti panagayatna kadagiti animals, napanunotna a pagbalinen ti maysa a pasetna a pakataraknan dagitoy. Paset metten daytoy ti adbokasiana a pannakasaluad kadagiti animal nangruna dagiti threatened ken endangered species wenno dagiti dandanin maungaw nga animales. Inlukatna daytoy para kadagiti mayat a mangkita kadagiti tarakenna, saan laeng a dagiti taga-Ilocos Sur no di pay dagiti taga-sabsabali a probinsia. Kinapudnona, nagbalinen a paset ti lakbay-aral dagiti pagadalan uray pay dagiti adda iti Kamanilaan ken Visayas ti panagpasiarda iti Baluarte.

 

Animal Show

Mamimpat iti kada aldaw tunggal alas dies ti bigat, alas dose iti agmatuon, alas dos ken alas kuatro iti malem, maikkan iti gundaway dagiti sangaili a maiggaman ken maaprosan dagiti mapili nga animales a maipresentar iti animal show. Babaen kadagiti mangimaton itoy, maipalawag dagiti banag mainaig kadagiti animal ala Kuya Kim Atienza iti Matanglawin.

(Adda tuloyna)