Kabakiran, naireport a nauram

DEL PILAR, Ilocos Sur – Mapattapatta nga aglawa iti sumurok kumurang innem nga ektaria a kabakiran ditoy nga ili ti naireport a nauram idi sardam ti Enero 31.

Segun iti report manipud iti police station ditoy, tinagamtam ti apuy ti Bantay Tawtawing, maysa a protektado a lugar ti Department of Environment and Natural Resources (DENR) a masarakan iti nagbeddengan ti Barangay Afonso ken Poblacion Norte ditoy nga ili.

Mapapati a rimsua ti uram babaen dagiti di nabigbig a mangnganup kadagiti atap nga animal nga agas-assisaw iti nadakamat a bantay.

Saan a nailanad iti report no mano ti kadagupan a balor dagiti kayo nga immuging gapu iti forest fire.#