Kabarbaro a motorsiklo ti guardia, natakaw

VIGAN CITY – Sabali manen a motorsiklo a kukua pay met ti maysa a guardia iti maysa a pasdek-negosio ditoy siudad ti natakaw idi rabii ti Marso 24.

Idi agarup 11:30 ti rabii ti nadakamat a petsa, inreport ni Winston Valdez Raysay, 27, baro, security guard iti Mart 1 ken residente iti Barangay Paratong, ditoy siudad, iti polis a natakaw ti motorsiklona a naiparking iti lauden a paset ti Mart 1 a pagguardiaanna.

Kinuna ni Valdez a naka-locked nga imparkingna ti kabarbaro a Honda Wave a motorsiklona iti nasao a lugar sa nagpatrolia iti aglawlaw daytoy ngem idi nagsubli, awanen ti motorsiklona iti nangiparkinganna.

Nagsawar dagiti polis ngem dida nasapulan ti lugan ti guardia.

Iti daytoy a bulan, sumagmamanon a motorsiklo ti naireport ditoy siudad a naitaray wenno natakaw manipud iti nakaiparkinganda.#