Kabarbaro a wage increase, impaulog ti Regional Tripartite Wages and Productivity Board

SAN FERNANDO CITY – Manipud iti P5 agingga iti P15 ti maituon iti dati a tegteggeden dagiti mangmangged ditoy rehion, daytoy ti impaulog ti Regional Tripartite Wages and Productivity Board ti Department of Labor and Employment, Region I.

Impakaammo ni DOLE Region I, regional director ken chairman ti Board Henry John S. Jalbuena babaen ti suratna a ti kopiana naiggaman ti Tawid News Magasin, iti panangipaulogna iti Wage Order No. RBI-12 a nagepekto idi Dec. 31, 2007.

Kanaig daytoy, impakaammo ti DOLE nga angayenna ti wage orientation seminar para iti pannakailawlawag ti kabarbaro a wage order kadagiti stakeholders iti probinsia ti Ilocos Sur iti malem ti Pebrero 14 iti University of Northern  Philippines.

Sagudayen ti pammilin a maingato iti P210 manipud iti P195 dagiti agtrabtrabaho iti plantasion ken P185 manipud iti P170 dagiti agtrabtrabaho iti small/municipal fishing. 

Maingato met iti P230 manipud iti P220 ti ganaren dagiti agtrabtrabaho kadagiti pribado nga educational institutions, transportasion, bodega ken komunikasion, elektrisidad, gas and danum ken panagpartuat (medium/large), ken panagminas ken panag-quarry.

Iti sabali a bangir, P5 laeng ti naituon iti dati a sueldo dagiti trabahador kadagiti bangko ken financial intermediaries, konstruksion, real estate, aktibidad iti paupaan ken negosio, komersial a panagkalap, tertiary care hospitals, hotel ken restaurants (small, medium/large), ken dagiti micro establishments a pakairamanan ti kooperatiba, pagpartuatan, hotel ken restaurant.

Wholesale and retail trade, repair of motor vehicle, motorcycle and personal and household goods (large, medium ken wholesale) – P10.00; (small ken micro) – P5.00;  other community, social and personal service activities, community and social services (large/medium/wholesale) – P10.00; (small/medium/large ken micro) – P5.00

Kababaan dagiti agtrabtrabaho iti secondary hospitals ta naikkanda laeng iti P3.00 wage increase.#