Footer

Kabaybayan ti Puro, binongbong 20 mangngalap

CAOAYAN, Ilocos Sur – Iti baet ti nainget a kampania maikontra iti illegal a panagkalap,  naisayangkat manen ti panagbongbong iti kabaybayan a paset ti Barangay Puro ditoy nga ili idi malem ti Disiembre 13.

Dagus a nagresponde dagiti polis ditoy nga indauluan ni PSI Edmar P. Quiton, hepe ti polis, ket nagturongda iti nadakamat a barangay a naglugan iti maysa a private motorized banca no sadino a nasaripatpatanda ti nasurok duapulo a bangka a naggaarimutong iti lugar a mapapati a nakaisayangkatan ti panagbongbong.

Ngem nasiputan dagiti mangngalap dagiti umas-asideg a polis ket nagdardarasda a naglibas.

Pinadas dagiti polis a kinamat dagiti naglibas a mangngalap ngem saanda a nakamatan ida.

Maysa nga agnagan Reynaldo Cerna y Briones, 63, naasawaan, ken residente iti nadakamat a lugar ti natiliw dagiti polis idi nagsublida iti lugar a nagbongbongan dagiti di nabigbig a nagisayangkat iti illegal a panagkalap.

Nakumpiska iti ikut ni Cerna dagiti nabongbongan nga ikan nga aber ken maysa a diver glass.

Naipan ti suspek ken dagiti nakumpiska a lames iti police station para iti naan-anay a disposision.

Kabayatanna, agdagup iti sangapulo ket uppat dagiti napipino nga iket a maaw-awagan iti balaong ti kinumpiska dagiti polis a naipakat iti Mestizo river partikular iti Barangay Pandan, Fuerte ken Villamar ditoy nga ili idi agsapa ti Disiembre 11.

Saan a nabigbig dagiti akinkukua kadagiti iket a naipan amin iti police station.

Kadua dagiti polis ti taga-Department of Agriculture a nangiwayat iti Operation Balaong kas panagtungpal iti pammilin ni Mayor Germie Singson-Goulart a pannakaikkat  kadagiti illegal a pagkalap iti Mestizo River.#