Kabit, nagpaturong iti paltog

TAGUDIN, Ilocos Sur –  Naggaud iti dua a bangka ni mister, resulta: riribuk ti simmangbay iti biagna.

Nagreport ni Herminia Mon Ortiz, 28, residente iti Barangay Lacong ditoy nga ili nga idi agarup 7:00 ti bigat ti nadakamat a petsa, pinaturongan iti paltog ni Mary Ann Leal y Luchina, 37, balo, mapapati a kabit ni Jestoni Ortiz y Duli, asawa ni Herminia.

Segun iti report, napan ni Mary Ann iti balay ni Jestoni ket apaman a nakita ni Herminia, dinarupna daytoy ngem pinaturongan ni Mary Ann iti paltog.

Kinumpiska ni Jestoni ti paltog manipud iti kabitna ket insukona daytoy kadagiti nagresponde a polis. Adda itan ti paltog iti PNP Crime Laboratory sadiay Bulag, Bantay, Ilocos Sur.

Saan a nailanad iti report no asino ti nakipaskuaan ni Jestoni.#