Kabkabanga iti aparador ni Kagawad Alcab (Maudi a paset)

Sarita ni Mancielito S. Tacadena

 

“Apay ngay dagiti lallaki kada babbai nga aglaaw no agririda nga agassawa mamulta met a tapno patas,” insalingat ni Kgd. Alcab.

“Wen a mairaman tapno dimo met kuna, kagawad,” binagi met ni Kgd. Penis.

“Babaen ti kastoy a wagas Kap, malapdan pay ti pannakapasamak ti krimen. Naammuanyo met ngatan ti naaramid kadaytay bakla nga editor ti Calaoa-an Books Inc. dita Barangay Lussoc a gineppasda ti tengngedna idi dina ited ti inkarina a bayad diay impaaramidna a dinudugiot. Natiambaanna met ngarud dagitay agbatbatak iti “S’. Imbag ta di nairaman ti esopagusna ta di ket koman a nakapaarayat piman,” kinunak manen.

“Aprobarantayo ngaruden ti resolusion ni kagawad Semilla, kakadua? inamad ti kapitan.

“Ay saan pay a, Kap, saantayo nga agdardarasudos. Baka gumura dagiti bakla no maammuanda dayta. Masapul pay ti committee hearing. Sa maysa, first reading pay met laeng dayta a resolution,” intakder pay ni Kgd. Alcab ti pananglappedna sana intallikud a kinuna, “Homophobic la unay ti linaonna. Baklan sa met ngamin dagiti mangilunglungalong. Adda pagsasao nga “Ang magnanakaw ay galit sa kapwa magnanakaw”.

“Ne, tanangem a ti panagsasaom Kagawad,” intakderko metten. “No bakla ti kumontra iti panagadu ti bakla iti lugartayo, di ngata nabakbakla ti mangisaksakit kaniada ta mariknana ti riknada?” inyingarko ket nalipatak a nataytayag iti lima a pulgada ngem siak.

“Relax, Apo Semilla. Saanmon a tutopan ni Alcab. Damagko ket kabasbastedna iti ar-armenna a Daisy Siete hehe. Intaray ti padana nga agtutubo. Pagan-anoda met ngamin aya ket laklakayanen. Style pay la idi 1975 ti estilona nga agarem,” inyarasaas ni Kgd. Quiqui sanak ingguyod iti suli.

Gapu ta sumipngeten idi rummuarkami iti barangay hall, inkanayonkon ti nagtarus iti Brgy. Paras idi maluganak ti motorsiklok. Aw-awaganda ti Barangay Sarap daytoy ta isu ti pannakared district ti ili a Calaoa-an. Adu dagiti pagiinuman ditoy a pakakitaan iti nababanglo a sabong ti rabii. Adda pay sumagmamano a gay bar. Apagisu la unay ta awan ni baket ta napan met simmarungkar iti balay da katugangak ken imbag la a pangiliwliwagak iti suronko ken ni Alcab. Personalenna metten ti impilak a resolusion. No dadduma, patiek pay ketdin a miembro iti pederasion ti loko a kagawad.

Sinabatnak a dagus ti nabayog ti panagbarbarukongna ken karuprupa ni Cristine Reyes a dama de noche manipud iti Maaligamgam Bar ket nupay diak pay nakasimsim iti serbesa, intaruskon nga inaprosan ti patongna.

Diak pay ketdin napupuotan ti oras. Tumengngan ti rabii idi akkalek ti arakup tay kateybolko. Ngem nausawanak a dagus idi mailasinko ti nabaked ken natayag a rumrummuar iti gay bar iti sango ti Maaligamgam a naggapuak. Nakaaklili pay daytoy iti braso ti maysa kadagiti macho dancer ken ilaglagidna ti barbasna.

Ni Kgd. Alcab, modelong charing? Isu pay la daytay atapko. Inruarko ti selponko ket inyagawak nga inalaan iti ladawan. Anian a kigtotna idi asitgak. Kasla nakinnit ti karasaen.

“Ania ngay, kagawad, ipasatayonton inton second reading tay resolusionko? Alangan met nga iyuraytayo pay la ti third reading?” inkiddayko.

“Apay, iblackmailnak Kgd. Semilla,” pinatibongna ti bosesna ngem diakon kabuteng dayta a timek.

“Saan met ketdi a, kagawad, ngem adda naalak a ladawan, sika. Mayat man a pang photo laughs iti facebook hehe,” kinunak ket nagnaakon nga immadayo tapno sakayakon ti motorko.

“Hoy, mabiit laeng, kagawad. Sige, diakon mangangay iti committee hearing. Iti sumaruno a session, aprubadon ti resolusionmo,” pinakulotnan ti timekna. Immasideg iti ayanko sana kinuna, “Dimonto kad’ la masasaon diay barangaytayo ti nakitam a, kagawad. Plssss…”

“Diak maipanamnama dayta, kagawad,” simro ti susutilak. “Ngem dimo kadi ammo nga uray kasano kauneg ti pangikutkotam iti palimedmo, rummuarto latta?”

Saan a nakatimek ni Kagawad Alcab. Idi agangay, kinunana: “Ania ngarud ti aramidek?”

“Kas nakunada iti impeachment court, “tell the truth and nothing but the truth, kagawad!” Ad-addan ti murareg ni kagawad. Pinagandarko ti motorsiklok, inukradko ti dakulapko, sako pinuyotan iti nakapapaut ken pinagimbudo ti subsobko ket anian nga ingget tibong ti flying kiss nga impatayabko sakbay a pinakayasko ti motorsiklok nga immadayo.#