Kable natakaw

BURGOS, Ilocos Sur – Dua a nagsina nga insidente ti panagtakaw iti kable ti naireportĀ  iti polis ditoy nga ili idi bigat ti Hulio 17.

Inreport ni Floro Pajarillo y Quemado, 53, naasawaan, ken residente iti Barangay Manabo, ditoy nga ili a nasukalanda a natakaw ti kable ti barangayda idi agarup 10:10 ti bigat ti nadakamat nga aldaw.

Iti panagimbestiga dagiti polis, naputed babaen ti bolo ti kable nga agatiddog iti 150 metro a mapattapatta nga agbalor iti P5,250.00.

Kabayatanna, sabali pay a panagtakaw iti kable ti naireport iti dayta met laeng a petsa iti Barangay Lukaban, Burgos, Ilocos Sur a nakatakawan ti PDX cable wires nga agatiddog iti 8 metro ken mapattapatta nga agbalor iti P2,800.00.

Sinarungkaran dagiti polis amin dagiti junkshops iti munisipio agraman dagiti kabangibangna no adda nagilaklako iti kable ngem negatibo ti resultana.#