CERVANTES – Ilocos Sur – Bonding – daytoy ita ti tema ni Gobernador Deogracias Victor Savellano tapno mayasideg ti rikna dagiti umili ti Ilocos Sur kadagiti nadumaduma nga ahensia ti gobierno probinsial babaen ti naisayangkat a KABSAT caravan iti dua nga ili iti upland itay Hunio 4 ken 5.
“Napimpintas ti panakilangenlangentayo kadakuada… no adda bonding,” kinuna ti gobernador iti interbio kenkuana ti media.
Naisayangkat iti daytoy nga ili iti bigat ti Hunio 4, ti maysa a medical ken dental mission, pakairamanan ti panagkugit. Naiwayat pay ti training ken seminar kadagiti tanod, BHW, BNS, DCC, barangay officials, babaen dagiti nadumaduma nga ahensia ti gobierno a nakipartisipar iti daytoy outreach program ti provincial government tapno maidanon ti serbisioda kadagiti agindeg kadagitoy dua nga upland municipalities.
Iti dayta met laeng a bigat, naiwaras dagiti ramit a kasapulan iti talon a pakairamanan dagiti kuliglig, tractor, hose a pagsibog, hose a para potable water, water pumps, dagiti certified seeds, agas, ken dadduma pay a serbisio.
Iti kamalmanna, naaramid ti basketball friendship game iti nagbaetan ti Cervantes team ken ti provincial team.
Maysa a pangrabii ti impaay ti gobierno munisipal para kadagiti sangaili a nagtokaran ti Cervantes Rondalia. Nagpabuya pay dagiti nadumaduma a barangay ken organisasion ditoy nga ili.
Kabigatanna, nagturong ti grupo iti Quirino tapno maidanon met kadagiti agindeg ditoy daytoy outreach program ti gobierno probinsial.#
