sinursuran-banner-sqSinursuranNi Jobert M. Pacnis

Kadagiti adipen ti tisa…

“TI kinamannursuro, saan laeng a mision. Maysa met daytoy a bokasion…”

Ramen daytoy ti sermon ti padi iti dinar-ayanna a misa a naisangrat kadakuada a mannursuro kadayta nga ili. Daytoy ket para iti selebrasion iti Aldaw Dagiti Mannursuro.

Bokasion, immaw-aweng iti isipna uray idi nalpasen ti sibubukel a programa para kadakuada nga immabot pay iti alas dose iti rabii.

Iti adun a tawen nga adipen ti tisa, akuenna, saannan a malagip ti kaaduan kadagiti ubbingna. No kasta a masabat wenno makitana dagitoy, adda daytay riknana a bumdeng nga agtimek. Ta, ney, dina metten malagip ti naganda. Am-ammona laengen ida iti rupa. Ngem alangan nga awaganna iti “hoy’ tapno laeng mapataliawna ida.

Ngem addada met ketdi am-ammona latta dagitoy uray no naundayen a panawen a naglabasda kenkuana. Ket makais-isem ta dagitay adda iti makunkuna nga extremes ti klase dagiti malagipna. Pagarigan dagiti nalalaing ken nasisingpet. Ken iti maysa a banda, dagidi sakit ti ulona idi.

Kas mannursuro, makarikna latta iti ragsak no kasta nga adda makalagip kenkuana— iti baet ti kinaestriktona kano idi kadakuada. Kas itay nabiit, adda post iti maysa a page nga i-tag dagiti makabasa ti/dagiti maestra wenno maestroda a saanda a malipatan.

Ket nai-tag. Agyamyaman ti nagbalin nga ubingna iti laksid kano ti kinaestriktona idi. Daytoy kano ti nangmuli kenkuana iti no ania ita a maysan a de-karera. Ket adda man nasagid iti kaungganna.

A nangpatibker pay kenkuana tapno ituloyna latta ti kinaadipenna ti tisa.

Wen, a, ta no dadduma, adda ‘tay riknanan a sumuko. Adu unayen dagiti banag a dina namnamaen iti Sistema nga inayatna iti adun a tawen.

Panagriknana, kumaro a kumaro dagiti ubbing iti tinawen. Iti nakaipalladawanna a disso, adu ti ganggannaet a sursuro kadagiti ubbingda. Dayta ti dakkel a karit kadakuada nga agkakadua.

Pagarigan, no didaka kailian, kasla yad-addadaka a suronen ken pagpungtoten. Maysa met dagiti nagannak ta kunsintidorda la unay. Ta pagpampannakkelda man la unay dayta kano Child Protection Policy.

Ay, ket ania ngarud, an-anusanda man nga agkakadua ti agpaspasensia. Narigat ti makasuan ken maikkat iti panggedan. Aglalo ta nangawngaw ita iti social media a no addan naiposte a biktima iti pagadalan, dagus a mapabasol ti kas kadakuada. Saandan nga ammuen ti pudno a napasamak.

Saanen a mangngeg ti biangda a maysada met la nga ordinario a tao. Addaan iti rikna a mabastos la unay. Nga uray kasano kaatiddog ti kurdon ti sapatosda, dumteng latta met a maungpot ti ungto daytoy.

Sa adda manen dayta kayat dagiti dadduma nga opisial a no homework policy (a natamingtayon iti napalabas) kalpasan daytay mass promotion—a pagkunaan dagiti kas kadakuada a simmadutan dagiti ubbing nga agbasa wenno mangsango kadagiti leksionda.

Inayon pay iti sangkakunada a the most stressful kano a trabaho ti panagisuro. Agpayso dayta. Ngem saan a dayta ti isyu. Ta kenkuana, inawatna, sinerrekna dayta a panggedan nga idi pay damo, ammona daytan. Saan ngarud a rumbeng nga agreklamo. Masapul nga annongenna ti papelna kadagiti ubbing.   

A no mabalin, dina kayat a panunoten a kasta ka-stressful ti nastrekanna. Dina kayat ti maipada kadagiti naireport a dua a kaso ti panag-suicide dagiti padana nga adipen ti tisa.

Ti laeng pagdaksanna, adu dagiti agsasao iti social media a kasla awan panangipirpiritda kadagiti mannursuro. Aglalaawda a kasla dida nagdalan kadagiti ima dagiti nagbalin a mannursuroda. Naglakada a pabasolen dagiti mannursuro. Saanda a malagip dagiti naimbag a banag a nalak-amda kadagitoy.

Pudno, kunkunana la ket ngarud, ‘tay kunada nga uray kasano kaadu ti naaramidan ti maysa nga indibidual a kinaimbag, maleplepan, malipatanen dagitoy oras a nagkabsiw ti maseknan uray naminsan laeng.

Ti pay nakaay-ayat no dadduma, a pangliblibianna kadagiti maseknan, ti nakaad-adu nga ibagbagada a linteg a mangingato kano iti sueldoda. Kanigid-kanawan ti maiwaragawag a gakat a mangtungpal itoy. Aglalo no kasta a masungad ti panagpipili. A dagus nga agmawmaw inton nalpasen ti basingkawel. Kasano, naalada man ngaminen ti suportada a mannursuro.

Ngem amin dagitoy saannan nga idaddadaneng. Agtrabaho ketdi latta, a kasla ‘tay awan uray-urayenna a kasukat; ‘tay awan ti pampanunotenna a “paasa” dagiti bulbullagaw nga opisial. No addanto, addanto latta. Saannen a masapul nga umarimbangaw pay. Agpaliiw laengen kadagiti mapaspasamak.

Iti panagtultuloyna a kas adipen ti tisa, saan a dina malagip dagiti nagbalin a mannursuro iti biagna. Saanna latta a malipatan dagitoy ket matmatda nga agyamyaman iti anusda idi kenkuana a nangisursuro. Ken nangkitkita iti dalanenna.

No masabat ken makitana dagitoy, dina malipatan a pagunian ida. Wenno iseman man laeng. Ta uray dagita laeng ti maisubadna kadagitoy.

Maiduma iti agdama a kasasaadna no dadduma. Adda dagitay kasla awan a nakitada no masabat dagiti nagbalin nga adalanna. A kasla dida am-ammo nupay saan met pay a nabayag a nagbalin a paset iti biagda.

Ik-ikkanna iti rason dagitoy no dadduma. Nalabit, mabainda. Wenno saanda laeng a nalasin. Wenno dagitoy dagidi ubbing a nakagura iti istratehiana a nagisuro kadakuada.

Sabagay, kunada met ketdi a you can’t please everybody… Ania man nga aramiden, saan nga amin ket magustuan wenno mapagustuanda– uray kasano kasayaat dayta nga aramid.

Itay nabiit, maysa a challenge ti napalabasna iti Facebook. I-post ti kas kadakuada dayta ket mauray dagiti nagbalin nga adalanda ti paboritoda a linia. Wenno dagiti saanda a malipatan nga aramidda idi agisursuroda.

Ngem imbes a kasta, binaliwanna ti linaon ti post. Inamadna ketdi (kadagiti nagbalin nga adalanna) no ania dagiti banag a nangguraanda kenkuana idi isursurona pay laeng ida.

Ay, ket, adda nagkuna a naiget unay idi. Agkaralangan kano idi isu a naud-udida iti leksion (a naipalpasna met laeng amin idi). Ngem dayta ket gapu iti panagsakitna idi.

Nupay kasta, ad-adda a positibo dagiti naawatna a komento.

No serioso dagiti nagkomento, saanna nga ammo. Ti napateg, pinulsuanna dagiti nagbalin nga adalanna tapno agbalin daytoy a pagsarminganna iti agtultuloy a kinaadipenna ti tisa ket ad-adda pay a mapasayaatna ti mangtapaya, mangkita ken mangayat kadagiti ubbing nga agtultuloy a maipakumit kadakuada.

Ta kalpasan ti amin, kas kuna ti adipen ti Dios iti misa a dinar-ayanna, saan laeng a maysa a mision ti kinamannursuro. Bokasion daytoy— nangatngato nga agpang. Aramid a mangitan-ok iti saan laeng a ti pisikal a bagi no di ket iti espiritual nga agpang. Ken mangitan-ok met iti kinatao dagiti adalan.

Kadagiti padana nga adipen ti tisa, alaenna daytoy a kablaawan ida iti Happy Teachers’ Day! Ken itangadna: umadu koma pay nga ubbing dagiti matulonganda. Ken mataginayon ti salun-atda.