Komentario: Kadakkelan a pyramiding scam iti Pilipinas | Tawid News Magazine - Weekly Ilocos News 📰

Kadakkelan a pyramiding scam iti Pilipinas

NAGADUN dagiti napasamak a pyramiding scam iti Pilipinas, ngem kasla saan a maleksionan dagiti Pilipino ta adu latta dagiti magargari ken masulisog iti kari a nangato nga interes ti kuartada.

Panagaramat iti relihion ken social media tapno makaguyugoy iti agarup lima a million a miembro wenno investor ti maibilang a kadakkelan a pyramiding scam iti Pilipinas a mapapati a nakakolekta iti nasurok a P50 Billion manipud kadagiti miembro.

Insayangkat ti National Bureau of Investigation ti pannakaipasardeng ti operasion ti Kabus Padatuon wenno Kapa Community Ministry International a nakabiktimaan dagiti nagadu a Pilipino kaaduanna dagiti taga-Mindanao ken Visayas.

Immandar ni Presidente Rodrigo Duterte ti pannakaiserra ti operasion ti Kapa, ken pannakaiserra dagiti amin nga opisinada gapu ta maibilang a pyramiding scam ar-aramiden ti agpampamarang a religious organization nga idadauluan ni Pastor Joel Apolinario tapno awanen dagiti mabiktima.

Indarumen ti Security and Exchange Commission (SEC) ti Kapa iti panaglabsing iti Security Act gapu iti illegal a panagala iti investment dagiti miembro.

Maibasar iti darum ti SEC, agawat ti Kapa iti investment nga awaganda iti donasion manipud P10,000 agingga iti P2 Million, ket addaan daytoy iti tungpal-biag ken binulan nga interes a 30%. Kaipapananna a ti P10,000 nga investment ket addaan iti binulan a P3,000 nga interes wenno awaganda iti “love gift wenno blessing” a binulan a kolektaen ti miembro.

Patien ni Presidente Duterte a maysa a pyramiding investment scam ti ar-aramiden ti Kapa ta awan ti uray maysa a banko iti intero a lubong a makaited iti 30% nga interes iti binulan. Dayta ti gapu a pinaserraanna ti operasion ti religious organization nga illegal nga agkolkolekta iti investment iti porma ti donasion.

Nagisayangkat iti prayer rally dagiti miembro ken investor iti Kapa. Dawdawatenda iti Presidente ti pannakaisubli ti operasion ti Kapa tapno maisubli dagiti intedda a donasion babaen iti ibilang a “blessing”

Naglemmengen ni Pastor Apolinario ta segun kenkuana ket agamak iti seguridadna. Impettengna a religious organization ti Kapa a ti panggepna ket tulongan dagiti napanglaw a miembro a makalung-aw iti rigat, ken saan nga investment scam ti ar-aramidenna. Impasingkedna a kabaelan ti Kapa nga ited ti interes wenno blessing kadagiti miembro no mapalubosan nga agtuloy ti operasion ti Kapa. Impanakkelna nga adda dagiti kompania a kukua ti Kapa ngem saanda a mabaelan nga ited ti interes wenno blessing dagiti investment wenno donasion dagiti miembro a minilion ti gatadna iti inaldaw gapu iti kaaduda.  

Agtultuloy ti panangbirbirok ti NBI ken Philippine National Police ken ni Pastor Apolinario, Nangiyetnagen ti korte ti hold departure order kenkuana ken dagiti nangato nga opisial iti Kapa. Nangiparuar metten ti Court of Appeals iti bilin a pannaka-freeze dagiti amin nga asset ti Pamilia Apolinario ken ti Kapa.

Iti laksid nga ipatpatangken ni Pastor Apolinario ken dagiti miembro ti Kapa a legal ti panagalada iti donasion, kontraen dayta ni SEC Chairman Emilio Aquino ken impettengna a maysa a panangloko wenno scam ti ar-aramiden ti agpampamarang a religious ministry ta imposible a ti maysa  a kompania ti makaipaay iti nakangatngato nga interes.

Tapno agbalin a miembro ti Kapa, ti investor ket agsurat laeng iti bassit a pormas ken mangited iti donasion a P10,000 agingga iti P2 a million.

Nailanad iti kontrata a ti donasion ket maaramat iti pannakagun-od ti mission ti Kapa para ti pannakaisaknap ti pammati ti relihion ken pannakapataud dagiti livelihood programs para ti pagimbagan dagiti miembro.

Nalawag a panangallilaw ti operasion ti Kapa a panangawagda iti donasion iti investment. Maibasar iti Civil Code of the Philippines, ti kaipapanan ti donasion ket boluntario a pannakayakar iti panagtagikua ken panagikut iti maysa a banag iti sabali a maibilang a sagut.

Iti operasion ti Kapa, ikarida a ti naidonar a kuarta ket dumakkel iti 30% iti tinawen iti tungpal-biag ti miembro. No madagup ti interes ti donasion, agbalin a 360% iti makatawen.

No maikompara ti porsiento nga ited ti Kapa kadagiti kadawyan nga investments, ti naitalek a kuarta ket addaan laeng iti interes a 5% agingga iti 9%. Dagiti government securities kas ti Treasury bills ken Treasury bonds ket addaanda laeng iti nasurok a 6% nga interes.

Nalawag a ti panagawat ti Kapa iti investment nga aglemlemmeng a donasion ket maibilang a pyramiding wenno Ponzi scheme, maysa nga investment program a mangidiaya iti imposible a nangato nga interes a maited kadagiti investors manipud iti puonan wenno kapital nga aggapu kadagiti kabarbaro nga investors wenno miembro.

Inlawlawag ni SEC Chairman Aquino a ti Kapa investment scheme ket saanna a masustener ta kasapulan iti P15 billion a binulan tapno mabayadan dagiti 5 million a miembro a nakaited iti donasion a P10,000 ti tunggal maysa.

Ipampanakkel dagiti miembro ti Kapa a nakaalada iti interes wenno blessing iti donasionda. Ngem saanda a maamiris a ti interes a naalada ket naggapu kadagiti kabarbaro a miembro.

Saan a masinunuo no kaanonto a matiliw wenno sumuko ni Pastor Apolinario tapno sungbatanna dagiti pammabasol kenkuana. Ni Pastor Apolinario ket tubo ti Bislig City, Surigao del Sur. Sigud isuna a disc jockey ken technician ti maysa nga FM radio station a nangirugianna iti operasion ti Kapa idi 2015. Immakar ti operasion iti Kapa sadiay General Santos City ken in-inut ti panagsaknapna sadiay Mindanao ken Cebu.      

Nakalkaldaang iti kaadu dagiti nabiktima a miembro ti Kapa ta narigat wenno saandan a maala dagiti intedda a donasion wenno investments. Nagkas-ang ta adda dagiti tattao a manger-aramat iti nagan ti Dios tapno makagargarida kadagiti miembro babaen iti sulisog iti nangato nga interes dagiti kuartada.