Footer

Kagawad, dida kayat agtugaw a barangay captain gapu iti death threat

BACNOTAN, La Union -Nasurok dua a lawas kalpasan ti pannakapapatay dagiti kandidato para barangay captain ti Barangay San Martin ditoy nga ili, awan  ti mayat nga agtugaw kas dadaulo ti nasao a barangay.

Nagkitakit da Chinita Pascua ken ni Diory Licudan, dagiti dua a kagawad a nakagun-od iti umuna a dua a kangatuan a butos nga agtugaw a kas barangay chairman gapu iti naawatda a death threat nga isuda ti sumaruno a mapapatay no awatenda ti posision.

Ngem iti interbiona iti Bombo Radyo La Union, kinuna ni Provincial Election Supervisor Joel Gines a no agbakante ti puesto ti kina-barangay captain, nakalanad iti election code a ti umuna wenno maikadua a barangay kagawad ti maital-o nga agtugaw iti nasao a puesto.

Kabayatanna, binuangayen ti police provincial office ti Special Investigation Task Force San Martin a mangisayangkat iti panagimbestiga mainaig iti pannakapapatay da Barangay Chairman Eulogia Arellano, 73,  ken ni Barangay Kagawad Francisco Hermosa, 50, agpada a kandidato para barangay captain ti nasao a lugar.

Ni Police Supt. Angelito D. Domangeng, deputy director for operations iti La Union ti naituding a mangidaulo iti task force.

Napapatay ni Hermosa bayat nga agur-urnos iti lakona a karne iti tiendaan publiko ti Bacnotan idi agarup alas 4:00 ti parbangon ti Oktubre 24 babaen dagiti di nabigbig a suspek a nagkalubbon iti motorsiklo.

Naideklara ni Hermosa a natayen idi maidanon iti Lorma Medical Center gapu kadagiti sugatna iti nadumaduma a paset ti bagina a nagtaud iti cal. 45.

Napapapatay met ni Arellano idi rabii ti Oktubre 23 bayat i pannaturogda nga aggasawa iti kuartoda. Saan pay a nabigbig ti nangpapatay kenkuana.

Mapapati a  nakaawat met iti death threat dagiti dadduma a nabutosan a barangay kagawad.#