Kagawad, mannalon, nagudas iti pammaltog

STA. LUCIA, Ilocos Sur – Dua a tao ti nagudas iti nagsina a pammaltog a naisayangkat iti Candon City ken ditoy nga ili idi Marso 3.

Naireport a natay iti pammaltog da William Jimenez y Gat-eb, 51, naasawaan, barangay kagawad ken residente iti Barangay Nagtablaan, Sta. Lucia ken ni Lauro Sayan y Salao, 52, naasawaan, mannalon ken residente iti Barangay Oaig daya, Candon City.

Saan pay a nabigbig dagiti pimmatay kadagiti dua a biktima.

Idi agarup 8:20 ti bigat ti Marso 3, napapatay ni Jimenez bayat ti panangtarimaanna ti nabtak a pilid ti traktora ni Sepolkray Valdez y Baingan, 28, naasawaan, mannalon, ken residente met laeng iti Barangay Nagtablaan.

Segun iti panagimbestiga dagiti polis, bayat ti panag-vulcanize ni Jimenez, dua a lalaki a nagkallugong iti bull cap ti kellaat nga immasideg sa pinaltogan ti maysa ti kagawad idinto a nagpaay a backup ti sabali.

Kinuna ni Valdez a binallaagan ti backup iti “Agtalnaka dita” bayat ti panangpaltog ti kaduana ti biktima iti nagsasaruno a daras.

Kalpasan ti pammaltog, naglibas dagiti suspek a nagnagna iti abagatan a laud a kumamang iti kataltalonan ken iti karayan ti barangay .

Nakasarak ti nagresponde a SOCO team a nakabase iti Candon City nga indauluan ni Supt. Nerino Daciego ken CIDG nga indauluan ni PCI Modesto Carrera iti uppat a kapsula ken dua a buli manipud iti cal. 45 iti nakapasamakan ti pammapatay.

Di pay ammo ti motibo ti pammapatay.

Kabayatanna, idi agarup 2:05 ti malem ti nasao met laeng a petsa, sinaruno dagiti kriminal a naglugan iti nalabaga a Honda TMX 155 ti Rusi single motor a nagluganan ni Sayan ket idi makadanon daytoy iti barangay road a sakup ti Parioc 1st, Candon City, dita a pinaltoganda ti biktima iti sumagmamano a daras a nagsagrapan daytoy kadagiti sugat iti nadumaduma a paset ti bagina ken nakatayanna a dagus.

Segun iti maysa a mannalon nga agsibsibug iti mulana a tabako sumurok kumurang a 100 metro ti kaadayona manipud iti barangay road, nakitana ti dua a single motor nga agpaabagatan ket sumagmamano a minuto kalpasanna, nakangeg kadagiti nagsasaruno a putok.

Nakarekobre dagiti inbestigador iti pito a kapsula ken maysa a buli iti crime scene.

Naipatulod dagitoy iti Candon PNP Crime Laboratory para iti ballistics examination.

Saan pay met nga ammo ti motibo ti pammapatay.#