Footer

Kagawad, nakalisi iti pammaltog

BADOC, Ilocos Norte – Maysa a kagawad ti Brgy Pagsanahan Sur, Badoc, Ilocos Norte ti nakalisi iti dakes a panggep iti biagna idi 7:00 ti rabii ti Nobiembre 5, 2018. Nainaganan ti biktima a ni Nick Vergara y Sagun, 52, naasawaan, brgy kagawad ken residente iti daytoy a lugar.

Segun iti biktima, nakatakder isuna iti dayta a rabii iti sango ti balayda a mangkumkumpunir iti barbecue stand idi makitana a sumungad manipud amianan ti dua a lallaki a nagkalubbon iti Honda TMX a motorsiklo nga awanan plate number.

Nakitana nga addaan iti paltog ti makinlikod a lalaki a nakatudo iti direksionna. Nagpaputok ti mamin-uppat a daras ti suspek ngem nalisian ti biktima a daras a naglemmeng iti uneg ti balayda. Naglibas iti direksion nga agpaabagatan dagiti suspek.

Dagus met a nangiruar ti flash alarm ti Badoc PS kadagiti kabangibang a police station tapno mangirusuatda iti dragnet operation tapno matiliw dagiti suspek. (Tawid News Team)