Kaiyayaon iti bangko a kuarta ti baket, nadukot

VIGAN CITY Sabali pay a baket ti nagbalin a biktima dagiti mandudukot idi malem ti Mayo 7 a nakapukawanna iti kuarta nga kaiyayaonna iti bangko.

Iti pulongna iti polis, kinuna ni Norma Borje y Aspacio, 70, naasawaan, ken residente iti Barangay Casiber, Santa, Ilocos Sur, a nadukot ti kuartana a P30,000.00 nga inkabilna iti uneg ti shoulder bagna.

Kas insalaysay ni Borje iti polis, idi agarup 9:30 ti bigat ti nadakamat a petsa, napan iti May Bank, Vigan Branch ket inruarna ti $700 a kuartana.

Nagturong ni Borje iti Two Brothers Grocery a masarakan iti Barangay 1, ditoy met laeng siudad, ket impasukatna ti doliar iti pisos.

Agdagup iti P30,000.00 ti nakaipasuplian ti doliarna.

Kinuna ni Borje nga inkabilna ti kuarta iti puraw nga envelope sana inkabil iti uneg ti nangisit a shoulder bagna.

Naggroseria ti biktima iti dayta met la a pagtagilakuan.

Agbayad koman ni Borge iti grinoseriana idi naduktalanna a partial a nakalukat ti bagna ket awanen ti kuartana.

Iti pannakaisurat daytoy, di pay nabigbig no sino ti nangsikuat iti kuarta ni Borge.

Nupay kasta, yur-uray ti kapolisan no nairekord ti CCTV ti pannakadukot ti baket iti uneg ti pagtagilakuan.

Iti kallabes, adda dagiti naireport a panagsipdut ngem kaadduanna a saandan a maidarum no matiliwda agsipud ta saan metten nga interesado ti biktima no napasublinan ti kuartana.#